ކުޅުދުއްފުށިން ފިޔާ އަލުވި އަދި ބިސް ހުސްވެއްޖެ

ރަމަޟާން މަސް ފެށެން ދެ ދުވަހަށް ވެފައިވާއިރު، އުތުރުގެ އެންމެ އާބާދީ ބޮޑު ކުޅުދުއްފުށިން ފިޔާ އަލުވި އަދި ބިސް ހުސްވެއްޖެ އެވެ.

ކުޅުދުއްފުށީގައި ހޯލްސޭލްކޮށް ވިޔަފާރިކުރާ ފަރާތްތަކުން ބުނީ މިތަކެތި މާލެއިން ގެންނަނީ މަދު އަދަދަކަށް ކަމަށާއި އެއީ ކުޅުދުއްފުށީގައި ހުންނަ އެސްޓީއޯ ފިހާރައިން ހެޔޮއަގުގައި ވިއްކާއިރު އެފަރާތްތަކަށް އެއަގުގައި ނުވިއްކޭތީ ކަމަށެވެ. އަދި މިދަނޑިވަޅުގައި ބާރުބޮޑުވެގެން މިދިޔައީ އެސްޓީއޯއިން ގެނައި ޝިޕްމެންޓު ހުސްވުމުގެ ސަބަބުން ކަމަށްވެސް އެފަރާތްތަކުން ބުނެއެވެ.

ކުޅުދުއްފުށީ އެސްޓީއޯއަށް ގެނައި ފިޔާ، އަލުވި އަދި ބިހުގެ ޝިޕްމަންޓު އިއްޔެ ހުސްވެފައި ވާއިރު ރޯދަމަހުގެ ފުރަތަމަ ދެ ހަފުތާގެ ތެރޭގައި ކުޅުދުއްފުއްޓަށް މިބާވަތްތައް ލިބޭނެ ކަމަށް އެފަރާތުން މައުލޫމާތު ދެއެވެ.

ހޯލްސޭލްކޮށް މުދާ ވިއްކާ ވަފާ، މިންވަރު އަދި އާޕޮއިންޓު ފިހާރައިން ބުނީ މިވަގުތު ފިޔާ އަލުވި އަދި ބިސް ހުސްވެފައިވާ ކަމަށާއި ރަމަޟާން މަހުގެ ފުރަތަމަ ހަފުތާގެ ތެރޭގައި އާއްމުންނަށް މިތަކެތި ލިބެން ހުންނާނެ ކަމަށެވެ. އެންމެ ފަހުން އާޕޮއިންޓުން ގެނައި 300 ބިސްކޭހާއި 200 ބަސްތާ ފިޔާގެ އިތުރުން 30 ބަސްތާ އަލުވި އެއްކޮށް މިއަދު މިވިކި ހުސްވެފައިވާ ކަމަށްވެސް އެފަރާތުން މައުލޫމާތު ދެއެވެ. އަދި މިހާރު ބިސްކޭހެއް ގެނެސްގެން ވިއްކޭނެ އެންމެ ހެޔޮ އަގަކީ 530 ރުފިޔާ ކަމަށްވެސް އެފަރާތުން ބުންޏެވެ.

ކުޅުދުއްފުށީ މިތުރު ފިހާރާގައި ފިޔާ އާއި ބިސް ނެތް ނަމަވެސް އަލުވި އެބަހުރި ކަމަށް އެ ތަނުން މައުލޫމާތު ދެއެވެ. އަދި ފިޔާ އާއި ބިސް ލިބޭނެ ދުވަހެއް ބުނަން ނޭނގޭ ކަމަށް އެތަނުން މައުލޫމާތު ދެއެވެ. މިތުރު ކުންފުނިން ސީދާ އިންޑިޔާއިން ފިޔާއާއި ބިސް އެތެރެކުރާއިރު މިތަކެތި ސަޕްލައި ކުރުމުގެ ވަރަށް ބޮޑެތި ދަތިތަކެއް ހުރިކަމަށް އެ ކުންފުނިން ބުނެއެވެ.

ކުޅުދުއްފުއްޓަކީ އުތުރުގެ 3 އަތޮޅުގެ މީހުން ވިޔަފާރިކުރުމަށް އަންނަ ރަށެކެވެ. ރޯދަމަހާ ދިމާކޮށް ބައެއް ތަކެތި ހުސްވެފައިވާއިރު ކުޅުދުއްފުށީގެ ބާޒާރުގައި ވެސް ތަކެތީ އަގުތައް ވަނީ އުފުލިފައެވެ.