ކުޅުދުއްފުށީ މީހަކަށް އޮޅުވާލައިގެން ރާސްޓަސް އަދި ރިލޯޑް މެދުވެރިކޮށް 4000 ރުފިޔާ އަތުލައިގަނެފި

ކުޅުދުއްފުށީ މީހަކަށް އޮޅުވާލައިގެން ރާސްޓަސް އަދި ރިލޯޑް މެދުވެރިކޮށް 4000 ރުފިޔާ އަތުލައިގެންފި އެވެ.

މިނޫހަށް މައުލޫމާތު ދެމުން ނަން ހާމަނުކުރުމަށް އެދި އެމީހާ ބުނީ ކަނޑުމަތީގައި ހުރި އިހަވަންދޫގެ ރައްޓެއްސެއްގެ ފޯން ކޮށްފައި އޭނާގެ ފޯނަށް ފައިސާ ފޮނުވައިދޭން އެދުނު ކަމަށެވެ.

“އޭނަ ގުޅާފަ ބުނީ ދިރާގު ނަމްބަރަށް 2000 ރުފިޔާގެ ރީލޯޑަކާއި ވަތަނިއްޔާގެ ނަމްބަރަށް 2000 ރުފިޔާގެ ރާސްޓަސްއެއް ފޮނުވައި ދީބަލާށޭ. އޭނަ ބުނީ ކުޅުދުއްފުއްޓަށް މި ލަފަނީ އޭ. ބަނދަރަށް ދިއުމުން ރުފިޔާދޭނަމޭ” އިހަވަންދޫގެ ރަށްޓެއްސަކަށް ފައިސާ ފޮނުވުނު ގޮތް ކިޔައިދެމުން އޭނާ ބުންޏެވެ.

މިމަހުގެ 6 ވަނަ ދުވަހުގެ މެންދުރު ފޮނުވި މި ރާސްޓަސް އާއި ރިލޯޑު ލިބުނުކަން އެނަމްބަރުން އަންގާފައިވާ ކަމަށާއި އެހެން ނަމަވެސް ކަންނެލި ދޯނި ކުޅުދުއްފުއްޓަށް ނައުމުން އަލުން އެ ދެ ނަމްބަރަށް ގުޅިއިރު ފޯން ނިއްވާލާފައިވާ ކަމަށްވެސް އެމީހާ ބުންޏެވެ. އަދި އިހަވަންދޫ އިން ގުޅި ރަހުމަތްތެރިޔާގެ އަންހެނުންނަށް ގުޅުމުން އެއީ އޭނާ ކުރި ކަމެއް ނޫން ކަމަށާއި އޭނާ ހުރީ ކަނޑުމަތީގައި ނޫންކަމަށްވެސް އަންހެނުން ބުނެފައިވާ ކަމަށް އެމީހާ ބުންޏެވެ.

މިމައްސަލަ ކުޅުދުއްފުށީ ޕޮލިސް ސްޓޭޝަނަށް މިހާރު ވަނީ ހުށަހަޅާފައި އެވެ.

ފުލުހުންގެ މީޑިޔާ އޮފިޝަލް ވިދާޅުވީ މިފަދަ މައްސަލަތައް ރާއްޖޭގައި އިތުރުވަމުންދާތީ ރައްޔިތުންގެ ސަމާލުކަމަށް މިކަން ފުލުހުން ކުރިންވެސް ގެނެސްފައިވާނެ ކަމަށެވެ. އަދި މިފަދަ މައްސަލަތަކަށް އިތުރަށް ސަމާލުވުމަށް އިލްތިމާސްކުރެއްވިއެވެ.

މިމައްސަލަ މިހާރު ކުޅުދުއްފުށީ ޕޮލިސް ސްޓޭޝަނުން ގެންދަނީ ތަހުގީގު ކުރަމުންނެވެ.