އެމްޑީޕީގެ “މަޖާކުރުން – ބިރަކާނުލާ ފޫހިފިލުވުން” ސިޔާސަތު މިއަދު ކުޅުދުއްފުށީގައި އިފްތިތާހުކުރަނީ

އެމްޑީޕީގެ ކުޅިވަރާ މުނިފޫހިފިލުވުމުގެ ސިޔާސަތު ކަމަށްވާ “މަޖާކުރުން – ބިރަކާނުލާ ފޫހިފިލުވުން” މިއަދު ކުޅުދުއްފުށީ ގައި ލޯންޗުކުރުން އޮންނާނެ ކަމަށް އެޕާޓީން ހާމަކޮށްފި އެވެ.

އެމްޑީޕީގެ ޒުވާނުން ގޮފީގެ ރައީސާ އައިމިނަތު ޝައުނާ ކުޅުދުއްފުށީގައި ހުންނަވައިގެން މިނޫހަށް މައުލޫމާތު ދެއްވަމުން ވިދާޅުވީ “މަޖާކުރުން ބިރަކާނުލާ ފޫހިފިލުވުން” ސިޔާސަތު ކުޅުދުއްފުށީގައި ލޯންޗުކުރުން މިއަދު ހަވީރު ޒޯން ސްޓޭޑިއަމްގައި އޮންނާނެ ކަމަށެވެ. އަދި އެސަރަހައްދުގައި ތަފާތު ކުޅިވަރުތަކާއިއެކު މިހަރަކާތް ކުރިއަށްދާނެ ކަމަށް ޝައުނާ ވިދާޅުވި އެވެ.

ޝައުނާ އިތުރަށް ވިދާޅުވީ މިދަތުރުގައި ކުޅުދުުއްފުށީގައި 5 ދުވަހު މަޑުކުރައްވާނެ ކަމަށާއި މަގުމަތީގައި ދިދަފަތި ދެމުމާއި ކުލަލުމުގެ ހަރަކާތްތައް ކުރިއަށްގެންދަވާނެ ކަަމަށެވެ. އެމްޑީޕީގެ ޒުވާނުން ގޮފީގެ މި ދަތުރުގައި އެމްޑީޕީގެ ޗެއަރޕާސަން ރީކޯ މޫސައާއި އެމްޑީޕީ ޒުވާނުން ގޮފީގެ އިސް ބޭފުޅުން ބައިވެރިވެލައްވައެވެ.

“މަޖާކުރުން ބިރަކާނުލާ ފޫހިފިލުވުން” ކުޅުދުއްފުށީގައި އޮންނާނީ މިއަދު ހަވީރު 4 ޖަހާއިރު އެވެ. ކުރިއަށް އޮތް ރިޔާސީ އިންތިހާބަށް އެމްޑީޕީގެ ތަފާތު އެކި ސިޔާސަތުތައް އަންނަނީ ހާމަކުރަމުން ނެވެ.