ސިކަންދަރު ބޯޓު ދިޔަވުން މިހާރު ވަނީ ކޮންޓްރޯލް ކުރެވިފައި: ބޯޓުގެ ވެރިފަރާތް

13:50

މިތުރު ކޮމްޕެނީގެ ވެރިޔާ މުހައްމަދު ޒުހައިރު ވިދާޅުވީ “ﷲގެ އިރާދަފުޅުން މިހާރު ދިޔަވުން ކޮންޓްރޯލް ކުރެވި ސިކަންދަރު ބޯޓު އޮތީ ރައްކާތެރި ހާލަތުގައި” ކަމަށެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން ޒުހައިރު ވިދާޅުވީ އިއްޔެ ތިލަފުށިން ބަރުކޮށް މާލެއިން ފުރައިގެން ކުޅުދުއްފުއްޓަށް ދަތުރުކުރި މި ބޯޓު ދިޔަވާ ކަމުގެ މައުލޫމާތު ލިބުނީ 11 ޖަހާކަންހާއިރު ކަމަށެވެ. އަދި ދިޔަގަނޑު ބޮޑުވާން ދިމާވީ ބޯޓުގެ 2 ޕަންޕު ފެއިލްވެ، ރިޒާވުގައި ހުރި ޕަންޕުވެސް މަސައްކަތް ނުކުރުމުންނެވެ.

ބޯޓުގައި 1800 ބަސްތާ ހިލަވެއްޔާއި 1000 ބަސްތާ ސިމެންތީގެ އިތުރުން 200 ގޭސް ފުޅި ހުންނާނެ ކަމަށާއި އޭގެ ތެރެއިން ބައެއް ތަކެތި އުކާލާފައިވާ ކަމަށްވެސް ޒުހައިރު ވިދާޅުވި އެވެ.

ރެއާއި މިއަދުވެސް  މޫސުން ގޯސްވެ ކަނޑު ގަދަކަން ފާހަގަ ކުރައްވަމުން ޒުހައިރު ވިދާޅުވީ މިކަމުގެ މައުލޫމާތު ކޯސްޓު ގާޑަށް ދިނުމުން ގަޑިއެއްހާއިރު ތެރޭގައި ބޯޓު އޮތް ށ.މާއުނގޫދޫގެ ސަރަހައްދަށްގޮސް ދިޔަހިއްކުމުގެ މަސައްކަތް ފަށާފައިވާ ކަމަށެވެ. އޭރު ބޯޓު ސަލާމަތް ވާނެ ކަމުގެ އެއްވެސް އުއްމީދެއް ނެތް ކަމަށާއި އެހެން ނަމަވެސް މިހާރު ބޯޓު އޮތީ ރައްކާތެރި ހާލަތުގައި ކަމަށްވެސް ޒުހައިރު ވިދާޅުވިއެވެ.

13:00

ކުޅުދުއްފުށީ މިތުރު ކޮމްޕެނީގެ ސިކަންދަރު ބޯޓު އަޑިއަށްދާކަމުގެ މައުލޫމާތު ލިބިއްޖެ އެވެ.

މާލެއިން ފުރައިގެން ކުޅުދުއްފުއްޓަށް ދަތުރުކުރަމުންދިޔަ މިދޯނި މިހާރު އޮތީ ށަވިޔަނި އަތޮޅާއި ނޫނު އަތޮޅާ ދެމެދުގައި ކަމަށް މައުލޫމާތު ލިބެއެވެ.

މައުލޫމާތު ލިބިފައިވާ ގޮތުގައި ބޯޓު ދިޔަވާން ފެށީ ދެ ޕަންޕު ފެއިލް ވުމުގެ ސަބަބުންނެވެ. ބޯޓު އަދި ފެންމަތީގައި އޮތް ނަމަވެސް ބައެއް މުދާ ވަނީ ކަނޑަށް އުކާލާފަ އެވެ.

މިކަމާ ގުޅިގެން މިތުރު ކޮމްޕެނީގެ ބަހެއް އަދި ވަނީ ލިބޭގޮތް ނުވެފައެވެ.

ދިޔަ ހިއްކުމުގައި އެމްއެންޑީއެފް ނޮދަރން އޭރިޔާއިން ދަނީ މަސައްކަތް ކުރަމުންނެވެ.

ސިކަންދަރު ބޯޓަކީ ކުރިން މާލެއާއި ކުޅުދުއްފުއްޓާ ދެމެދު މީހުން ދަތުރުކުރުމަށް ބޭނުންކުރި ބޯޓެކެވެ. ނަމަވެސް ދިމާވި އަލިފާނުގެ ހާދިސާއެއްގެ ސަބަބުން ބޯޓުގެ ބޮޑުބައެއް އެނދުމުން ފަހުން ވަނީ ހަމައެކަނި މުދާއުފުލާ ބޯޓެއްގެ ގޮތުގައި ބޭނުން ކުރަން ފަށާފަ އެވެ.