ދީނުގެ ހަމަތަކުގެ މަތިން މަޖާކޮށް ބިރަކާ ނުލާ ކުޅިވަރު ކުޅެވޭނެ މަގު ފަހި ކޮށްދޭނަން: އެމްޑީޕީގެ ޗެއާޕާސަން

ދީނުގެ ހަމަތަކުގެ މަތިން މަޖާކޮށް ބިރަކާ ނުލާ ކުޅިވަރު ކުޅެވޭނެ މަގު އެމްޑީޕީގެ ސަރުކާރެއްގައި ފަހި ކޮށްދޭނެ ކަމަށް އެމްޑީޕީގެ ޗެއާޕާސަން ރީކޯ މޫސާ މަނިކު ވިދާޅުވެއްޖެ އެވެ.

މޫސާ މަނިކު މިހެން ވިދާޅުވީ އެމްޑީޕީގެ ޒުވާނުންގެ ސިޔާސަތު ކަމަށްވާ “މަޖާކުރުން – ބިރަކާ ނުލާއި ފޫހިފިލުވުން”ގެ ސިޔާސަތު ކުޅުދުއްފުށީގައި މިއަދު އިފްތިތާހު ކުރުމަށް ކުޅުދުއްފުށީ ޒޯނު ސްޓޭޑިއަމް ގައި ހަވީރު އޮތް ރަސްމިއްޔާތުގައި ވާހަކަފުޅު ދައްކަވަމުންނެވެ.

މޫސާ މަނިކު ވިދާޅުވީ ކޮންމެ މީހަކަށް ވެސް ދީނުގެ ހަމަތަކުގެ މަތިން މަޖާ ކޮށް ބިރަކާ ނުލާ ކުޅިވަރު ކުޅެވޭނެ މަގު އެމްޑީޕީގެ ސަރުކާރެއްގައި ފައި ކޮށްދޭނެކަމަށާއި ޒުވާނުން ކުޅިވަރާއި މަޖަލުގައި ތިއްބާ ފުލުހުން ފޮނުވާ އެތަން ފަނިކޮށްލުމުގެ ފުރުޞަތު ނުދޭނެ ކަމަށެވެ.

އެމްޑީޕީގެ މަޖާކުރުމުގެ ސިޔާސަތުގެ ތެރެއިން އެޕާޓީގެ ވެރިކަމެއްގައި ކުޅިވަރު އެކުވެނި ތަރައްގީ ކުރުމަށް 150،000،000 ރުފިޔާ ބަޖެޓް ގައި ހިމަނާނެކަމަށާއި އެގޮތުން ސާފިންގ އިންފުރާސްޓްރަކްޗަރ ތަރައްގީ ކުރުމާއި 1720 ލީގެއް ގާއިމް ކޮށް އެސޯސިއޭޝަން ތަކާއެކު އެކަން އާލާކޮށް ހިންގުމާއި ގައުމީ އެތުލީޓުނާއި ސްޕޯޓްސްމަނުންނަށް ހަދައިދޭ ސެންޓްރަލް ކޮންޓްރެކްޓަށް ފަސް އަހަރު ތެރޭގައި ޖުމުލަ 30 މިލިޔަން ރުފިޔާގެ ހަމަޖައްސައި ދިނުން ހިމެނޭނެ އެވެ. އަދި އާއްމު ދުޅަހެޔޮކަން ގާއިމް ކުރުމަށް 210 މިލިއަން ރުފިޔާ ތަފާތު އެކި ކުޅިވަރު ތައް ތަރައްގީ ކުރުމަށް ހަމަޖައްސާ ދޭނެކަމަށެވެ.

އެންޓަޓެއިންމެންޓް ޓްރަސްޓާއި އެންޓަޓައިންމެންޓް ހައުސް އާއި ޔޫތު ސެންޓަރު ތަކާއި ކުދި ސިނަމާތައް ރާއްޖޭގެ އެކި ކަންކޮޅުތަކުގައި ގާއިމް ކުރުމަށް އެމްޑީޕީގެ ސަރުކާރެއްގައި 5 އަހަރު ތެރޭގައި 75 މިލިއަން ރުފިޔާ ހޭދަކުރައްވާނެ ކަމަށް ވެސް އެމްޑީޕީގެ ޗެއާޕާސަން ވިދާޅުވި އެވެ.

ކުޅުދުއްފުށީގައި މިއަދު މިނީ މެނިފެސްޓޯ އިފްތިތާހް ކުރުމަށް ބޭއްވި ރަސްމިއްޔާތުގައި ފުޓްބޯޅަ އާއި ވޮލީ އަދި ބަށި މެޗު ތައް ކުޅެފައި ވެއެވެ.