ކުޅުދުއްފުށީ “ހޮނިހިރު ބާޒާރު”ގައި ތަކެތީގެ އަގުތައް އުފުލިއްޖެ

ރަމަޟާން މަހުގެ ފުރަތަމަ ހޮނިހިރު ދުވަހު ކުޅުދުއްފުށީގެ “ހޮނިހިރު ބާޒާރު”ގެ އަގުތައް އުފުލިއްޖެ އެވެ.

މިއަދު ހޮނިހިރު ބާޒާރުގައި ތަކެތީގެ އަގު އުފުލުނު ކަމުގައި ވިޔަސް ބާޒާރުމަތީގައި މީހުން ފުރިބާރުވެފައިކަން ފާހަގަ ކުރެވެއެވެ.

ކޮންމެ ހޮނިހިރު ދުވަހަކު ކައިރި އަތޮޅުތަކުން ކުޅުދުއްފުއްޓަށް އައިސް ވިއްކާ ދިވެހި އުފެއްދުންތަކުގެ ބާޒާރުގައި މިއަދު ހުރި ހުރިހާ ތަކެތީގެ އަގު އުފުލިފައިވާއިރު އެންމެ އަގު ބޮޑު ވެފައި ވަނީ ވަޅޯމަސް، ކަރާ، މިރުސް ފަދަ ރޯދަމަހު އެންމެ ބޭނުން ކޮށް އުޅޭ ތަކެތިންނެވެ.

މިއަދު ވަޅޯމަސް ކިލޯއެއް 100ރ. އާއި 150ރ. ދެމެދުގައި ހުރިއިރު ކަރާ ކިލޯއެއްގެ އަގު އުޅެނީ 25ރ. އާއި 35ރ. ދެމެދުގައެވެ.

މިރުހެއް ވަކިން 2ރ. އާއި 5ރ. ދެމެދު ހުރިއިރު ކުރުނބާގެ އަގު އުޅެނީ 10ރ. އާއި 15ރ. ދެމެދުގެ އަގުތަކެއް ގައެވެ.

މިއަދު ހޮނިހިރު ބާޒާރުގައި އެންމެ އަގު ހެޔޮކޮށް ހުރީ ފަތްޕިލާވެއްޔެވެ. އެގޮތުން ކޮޕީފަތެއް 1 ރުފިޔާ އާއި 2 ރުފިޔާ އަށް ހުރިއިރު ކުށްޅަފިލާފަތް ބޮނޑިއެއް އުޅެނީ 5 ރ. އަށެވެ. އަދި ލެޓިއުސް ބޮނޑިއެއް 5ރ. އާއި 10ރ. ދެމެދުގައި ހުރި އިރު ބޯވެލިފަތް ބޮނޑިއެއް އުޅެނީ 5ރ. އަށެވެ.

ހޮނިހިރު ބާޒާރުގައި ގިނަ ބާވަތްތައް ހުރިއިރު ފަޅޯ، އަނބު، ކިއުކަންބާ، ބަރަބޯ، ބަށި، ބަބުކެޔޮ ފަދަ ބާވަތްތަކުން ކިލޯއަކުން 5ރ. އާއި 10ރ. ދެމެދު އަގު ވަނީ ބޮޑު ކޮށްފައެވެ. ހޮނިހިރު ބާޒާރުގައި ބާވަތްތައް އަގު އުފުލުނު ނަމަވެސް ގިނަ ތަކެތި ވަނީ 12 ޖަހަން ވާއިރަށް ހުސްވެފައެވެ.

ކޮންމެ ހޮނިހިރު ދުވަހަކުވެސް ކައިރި ރަށްރަށުގެ ގިނަ ބަޔަކު ކުޅުދުއްފުއްޓަށް އައިސް ތަރުކާރީއާ މޭވާގެ ބާވަތްތައް ކުޅުދުއްފުއްޓަށް ވިއްކައެވެ.