ފަރުދީ މަސްލަހަތަށްވުރެ ގައުމީ މަސްލަހަތު އިސްކުރުމަށް ހދ އަތޮޅު ކައުންސިލުގެ ރައީސް ގޮވާލައްވައިފި

ކޮންމެ މީހަކުވެސް ފަރުދީ މަސްލަހަތަށްވުރެ ގައުމީ މަސްލަހަތު އިސްކުރުމަށް ހދ އަތޮޅު ކައުންސިލުގެ ރައީސް ހުސެއިން ރަޝީދު ގޮވާލައްވައިފި އެވެ.

މިނިވަން ދުވަހުގެ މުނާސަބަތުގައި ހދ އަތޮޅު ކައުންސިލް އިދާރާގައި ބޭއްވި ދިދަ ނެގުމުގެ ރަސްމިއްޔާތުގައި ވާހަކަފުޅު ދައްކަވަމުން ހުސެއިން ރަޝީދު ވިދާޅުވީ ރާއްޖޭގެ މިނިވަންކަން ގެއްލިގެން ގޮސްފައިވާ ކޮންމެ ދަނޑިވަޅެއްގައި މިނިވަންކަން، ގެއްލި އެހެން ގައުމެއްގެ އަޅުވެތި ކަމުގެ ތެރެއަށް ދާން ޖެހިފައިވަނީ ސިޔާސީ ކޯޅުންތަކުގެ ސަބަބުން ގައުމުގެ މަސްލަހަތަށް ވުރެ ފަރުދީ މަސްލަހަތު އިސްކުރެވިގެން ކަމަށެވެ. އަދި މިއަދު ރާއްޖޭގައި އޮތް ސިޔާސީ ޕާޓީތަކުގެ ކޯޅުމަކީވެސް ބޭރު ބައެއްގެ އަޅުވެތިކަމުގެ ދަށަށް ގައުމު ދިއުމަށް މަގުފަހި ވެދާނެ ކަމެއް ކަމަށާއި އެހެން ކަމުން އެއްވެސް މީހަކު ގައުމީ މަސްލަހަތަށް ވުރެ ޕާޓިގެ މަސްލަހަތު އިސްނުކުރުމަށް ގޮވާލެއްވި އެވެ.

ހދ އަތޮޅު ކައުންސިލުގެ ރައީސް ވިދާޅުވީ ސިޔާސީ ގޮތުން ހަރަކާތްތެރިވާ ހުރިހާ ބޭފުޅުންވެސް އަމިއްލަ މަސްލަހަތު އިސްނުކޮށް، ގައުމުގެ މަސްތަގުބަލަށްޓަކައި، ބޭރު ބައެއްގެ އަޅުވެތި ކަމުގެ ދަށަށް ގައުމު ނުދާނޭހެން މަސައްކަތް ކުރުމަކީ ގައުމުގެ މާޒީގެ ތަޖުރިބާއިން އިބުރަތްތަކެއް ހާސިލު ކުރަންޖެހޭ ކަމެއް ކަމަށެވެ. ރާއްޖެގެ މިނިވަންކަން އެކިދުވަސް ވަރު ގެއްލިގެން ގޮސްފައިވާ ގޮތުގެ ތާރީހަށް އަލިއަޅުވާ ހުސައިން ރަޝީދު ވާހަކަ ދައްކަވާފައި ވެއެވެ.

ރޭ ކައުންސިލް އިދާރާގެ ގޯތި ތެރޭގައި ބޭއްވި މި ދިދަ ނެގުމުގެ ރަސްމިއްޔާތުގައި ސިފައިންނާއި ފުލުހުންގެ އިތުރުން ކުޅުދުއްފުށީގެ ކައުންސިލަރުންނާއި ސަރުކާރު މުއްޒަފުން އަދި ސްކޫލު ކުދިންނާއި ގިނަ އާއްމު ބައިވެރިވި އެވެ.