ކޮންމެ ތިން ދިވެއްސަކުން ދެ ދިވެހިންނަކީ ވަތަނިއްޔާގެ ކަސްޓަމަރެއް: ވަތަނިއްޔާ

ކޮންމެ ތިން ދިވެއްސަކުން ދެ ދިވެއްސަކީ ވަތަނިއްޔާގެ ކަސްޓަމަރެއް ކަމަށް ވަތަނިއްޔާއިން ހާމަކޮށްފިއެވެ.

ވަތަނިއްޔާ ޓެލެކޮމް މޯލްޑިވްސް އިން މިއަދު ފާހަގަ ކުރަމުންދާ އެ ކުންފުނީގެ 8 ވަނަ އަހަރީ ދުވަހާ ގުޅިގެން ނެރެފައިވާ ބަޔާނެއްގައި ބުނެފައިވަނީ ދިވެހިރާއްޖޭގެ ރައްޔިތުންގެ ތެރެއިން ކޮންމެ 3 ރައްޔިތުން ކުރެ އެއް ރައްޔިތަކީ ވަތަނިއްޔާގެ ކަސްޓަމަރެއް ކަމަށާއި މިއަދާއި ހަމައަށް އެކުންފުންޏަކީ ވަރަށް ކާމިޔާބު ކުންފުންޏެއް ކަމަށެވެ.

މިގޮތުން ވަތަނިއްޔާ އިން ދިވެހިރާއްޖޭގެ އާބާދީ 99 އިންސައްތަ އަށް 2ޖީ ނެޓްވޯކް ކަވަރ ކޮށްދީފައިވާ ކަމަށާއި، އާބާދީގެ 75 އިންސައްތަ އަށް ވަތަނިއްޔާގެ 3ޖީ ނެޓްވޯކް ލިބެމުންދާ އިރު، އެކުންފުނިން ދިވެހި ރާއްޖޭގައި އަލަށް 4ޖީ ނެޓްވޯކް ވެސް ތައާރަފްކޮށްފައިވާ ކަމަށްވެސް އެ ބަޔާނުގައި ވެއެވެ. އަދި ރާއްޖޭގެ އާބާދީގެ 31 އިންސައްތަށް ވަތަނިއްޔާ އިން ވަނީ 4ޖީ ނެޓްވޯކް ތައާރަފްކޮށްފައި ވާކަމަށްވެސް އެފަރާތުން ހާމަކުރެއެވެ.

2005 ވަނަ އަހަރުގެ އޮގަސްޓް އެއްވަނަ ދުވަހު ވަތަނިއްޔާ އިން ހިދުމަތް ފޯރުކޮށްދޭން ފެށުމާއި އެކު އެކުންފުނި ވަނީ އެންމެ ފަހުގެ ޓެކްނޮލޮޖީ ކަސްޓަމަރުންނާ ހަމައަށް ފޯރުކޮށްދިނުމަގައި އެންމެ އިސް ސަފުގައި ހަރަކާތް ތެރިވަމުންނެވެ.