ކުމުންދޫގައި ޕިކަޕަކުން ވެއްޓުނު ކުޑަ ކުއްޖަކު މަރުވެއްޖެ

ހދ. ކުމުންދޫގައި ޕިކަޕަކުން ވެއްޓުނު ކުޑަ ފިރިހެން ކުއްޖަކު މަރުވެއްޖެ އެވެ.

ކުމުންދޫ ބަނދަރު މަތިން ދިޔަ ޕިކަޕަކުން ވެއްޓި ލިބުނު ގެއްލުންތަކެއް ސަބަބުން މަރުވެފައިވަނީ ކުމުންދޫ، އިކުލީލުގެ، ތަސްލީން މުޙައްމަދު، 10 އެވެ.

މިއަދު އިރުއޮއްސި ހަތެއްޖަހާލާއިރު ކުރުނބާތަކެއް އަރުވައިގެން ބަނދަރު މައްޗަށް ދިޔަ ޕިކަޕެއްގައި އިން މިކުއްޖާ ޕިކަޕުން ވެއްޓުމުން ލިބުނު ގެއްލުންތަކަށް ފަރުވާ ދިނުމަށް ކުމުންދޫ ހެލްތު ސެންޓަރަށް ގެންގޮސް ވަނީ ފަރުވާ ދީފައެވެ. އަދި މިރޭ 11 ޖެހިއިރު ކުޅުދުއްފުށީ ރީޖަނަލް ހޮސްޕިޓަލް އަށް ގެނެސް އެމެޖެންސީ ގައި ފަރުވާ ދެމުންދަނިކޮށް މި ކުއްޖާ ވަނީ މަރުވެފައެވެ.

މައުލޫމާތު ލިބިފައިވާ ގޮތުގައި ޕިކަޕުން ވެއްޓުމުގެ ސަބަބުން އެކުއްޖާގެ ފުއްޕާމެއަށް ވަނީ ގެއްލުންތަކެއް ލިބި ނޭވާލާން އުނދަގޫ ވެފައެވެ. ނަމަވެސް ހޮސްޕިޓަލުން މިހާތަނަށް ބަހެއް ލިބޭގޮތް ވަނީ ނުވެފައެވެ.