ކުޅުދުއްފުށީގައި 17 އަހަރުގެ ކުއްޖަކު ބަލިވެއިން މައްސަލައަކާ ގުޅިގެން ޒުވާނަކު ހައްޔަރުކޮށްފި

ކުޅުދުއްފުށީގައި 17 އަހަރުގެ އަންހެން ކުއްޖަކު ބަލިވެއިން މައްސަލައަކާ ގުޅިގެން ޒުވާނަކު ހައްޔަރު ކޮށްފި އެވެ.

ފުލުހުން ވިދާޅުވިގޮތުގައި ކައިވެނީގެ ބޭރުން ބަލިވެއިން މައްސަލައިގައި ހައްޔަރުކޮށްފައިވަނީ 22 އަހަރުގެ ފިރިހެނެކެވެ. ކުޅުދުއްފުށި އޮންލައިން މައުލޫމާތު ލިބިފައިވާ ގޮތުގައި މިމައްސަލައާ ގުޅިގެން ހައްޔަރު ކޮށްފައިވަނީ ކުޅުދުއްފުށީ، ސުހާނީ، އަހުމަދު ހަސަން (22އ) އެވެ. މިދިޔަ ބުރާސްފަތި ދުވަހު ހައްޔަރުކުރި މި މީހާގެ އިތުރު މައުލޫމާތެއް ފުލުހުން ހާމަކޮށްފައެއް ނުވެއެވެ.

ކުޅުދުއްފުށީގައި ހުންނަ ފެމެލީ އެންޑް ޗިލްޑްރަންސް ސާރވިސް ސެންޓަރުން ފުލުހުންނަށް ހުށަހެޅި މިމައްސަލައާ ގުޅިގެން ހައްޔަރުކުރި މީހާގެ ބަންދުގެ މުއްދަތަށް ކުޅުދުއްފުށީ ކޯޓުން 15 ދުވަސް ވަނީ ޖަހާދީފަ އެވެ.

ފުލުހުންގެ މީޑިޔާއިން މައުލޫމާތު ދޭ ގޮތުގައި، ބަލިވެއިން ކުޑަކުއްޖާގެ ބަނޑަށް މިހާރުވަނީ 7 މަސް ފުރިފަ އެވެ.

އެ އަންހެން ކުއްޖާ ބަލިވެއިން ފަހުން ބަރާބަރަށް ހޮސްޕިޓަލަށް ދައްކަމުން އަންނަކަން އެނގިފައި ވެއެވެ.

މި މައްސަލަ ކުޅުދުއްފުށީ ފޮލިސް ސްޓޭޝަނުން މިހާރު ދަނީ އިތުރަށް ތަހުގީގު ކުރަމުންނެވެ.