ރާއްޖޭގެ މިނިވަންކަމާއި އިސްތިގުލާލު ހޯދުމަށް ބޮޑުތިލަދުންމައްޗަށް ވުރެ ބޮޑަށް މަސައްކަތްކުރި އެހެން ބަޔަކު ނުތިބޭނެ: އައްބާސް އާދިލް ރިޒާ

ދިވެހިރާއްޖޭގެ މިނިވަންކަމާއި އިސްތިގުލާލު ހޯދުމަށް ބޮޑުތިލަދުންމައްޗަށް ވުރެ ބޮޑަށް މަސައްކަތްކުރި އެހެން ބަޔަކު ރާއްޖޭގައި ނުތިބޭނެ ކަމަށް ގައުމީ އިއްތިހާދު ޕާޓީގެ ކައުންސިލް މެމްބަރު އައްބާސް އާދިލް ރިޒާ ވިދާޅުވެއްޖެ އެވެ.

އައްބާސް އާދިލް މިހެން ވިދާޅުވީ ކުޅުދުއްފުށީގައި އެޕާޓީގެ ޒުވާނުންގެ ޖަގަހަ ހުޅުވުމުގެ ގޮތުން ބޭއްވި ބައްދަލުވުމުގައި ވާހަކަ  ދައްކަވަމުންނެވެ. އައްބާސް ވިދާޅުވީ ދިވެހި ތާރީހުގައި، ދިވެހިރާއްޖޭގެ މިނިވަންކަމާއި ދިވެހި ރާއްޖޭގެ އިސްތިގުލާލަށް، ބޮޑުތިލަދުންމައްޗަށް ވުރެ ބޮޑަށް މަސައްކަތް ކުރި ބަޔަކު އެހެން ބަޔަކު ފެންނަން ނެތްކަމަށެވެ.

އޭނާ ވިދާޅުވީ މިހާރު ޒުވަނުންނަށް މިނިވަންކަމުގެ އަހައްމިއްޔަތު އެހާ ބޮޑަށް އެގިފައި ނޯވެދާނެ ކަމަށާއި އެއީ އެއްވެސް ގައުމެއްގެ މިފަދަ މަސައްލަތަކުގެ ތެރެއަށް ޒުވާނުން ވަދެ ނޫޅޭތީ ކަމަށެވެ. އެހެންނަމަވެސް ބޮޑުތިލަދުންމައްޗަކީ ދިވެހިރާއްޖޭގެ މިނިވަންކަމާއި އިސްތިގުލާލާއި އިސްލާމް ދީން ހިމާޔާތް ކުރެއްވި ކެރޭ ހިތްވަރުގަދަ ޒުވާނުން އުއްފެދި ސަރައްހައްދެއް ކަމަށް އައްބާސް ވިދާޅުވި އެވެ.

އައްބާސް އާދިލް ރިޒާ އިތުރަށް ވިދާޅުވީ މިޖީލުގެ މިނިވަންކަމުގެ ބާނީއަކީ ކުޅުދުއްފުށި ކަން، ސެޕްޓެމްބަރު 7 ގައި ލާ ވޯޓުން ބޮޑު ތިލަދުންމަތީގެ 65000 ރައްޔިތުންނަށް ދައްކާދޭނެ ކަމަށެވެ.

ކުޅުދުއްފުށީގައި އާދީއްތަ ދުވަހުގެ ރޭ ހުޅުވި ޒުވާނުންގެ ޖަގަހަ ހުޅުވައިދެއްވީ ރައީސުލްޖުމްހޫރިއްޔާގެ އަނބިކަބަނލުން އިލްހާމް ހުސެއިންނެވެ.