ހަނިމާދޫގެ ބަނދަރުމަތީގައި އެއްފަހަރާ 1900 މީހުންނަށް އީދު ނަމާދު ކުރެވޭ ގޮތަށް ތައްޔާރުކުރަނީ

އީދު ދުވަހުގެ އީދު ނަމާދު ކުރުމަށްޓަކައި 1900 މީހުންނަށް އަމާޒުކޮށްގެން ހަނިމާދޫގެ ބަނދަރުމަތި ތައްޔާރުކުރަން ފަށައިފިއެވެ.

މިނޫހަށް މައުލޫމާތު ދެއްވަމުން ހަނިމާދޫ ކައުންސިލްގެ ނައިބު ރައީސް މަސްއޫދު އާދަމް ވިދާޅުވީ ކައުންސިލް އިދާރާއާއި ހަނިމާދޫ ޒުވާނުންގެ ޖަމިއްޔާ އަދި ސާއްބަ އެކުވެރި ކުލަބު ގުޅިގެން މިއަހަރުގެ ފިތުރު އީދު ނަމާދު ބަނދަރުމަތީގައި ކުރަން ހަމަޖެހިފައިވާ ކަމަށެވެ.

މިގޮތުން އެސަރަހައްދުގައި ހުރި ގައުތައް ނެގުމުގެ މަސައްކަތް މިއަދު ކުރިއަށްދާނެ ކަމަށާއި ތަނުގައި އަޅަން ހަމަޖެހިފައިވާ ތަރަފާލު ލިބިފައިވާ ކަމަށް މަސްއޫދު ވިދާޅުވި އެވެ. އަދި އެސަރަހައްދު ހިޔާ ކުރުމަށް ބޭނުންވާ ސަތަރި ވެސް ދަމާނެ ކަމަށް މަސްއޫދު ވިދާޅުވި އެވެ.

މިކަމުގެ ހަރަކާތްތެރިވާ ސާއްބަ އެކުވެރި ކުލަބުގެ މެމްބަރެއް ވިދާޅުވީ މިފަހަރުގެ އީދު ނަމާދަށް ތަން ތައްޔާރު ކުރުމުގައި ޒުވާނުންގެ ބޮޑު އެއްބާރުލުމެއް ލިބެމުން އަންނަ ކަމަށާއި ކުރިއަށް އޮތް ތަނުގައި ވެސް އެފަދައިން ލިބޭނެ ކަމަށް އުއްމީދު ކުރައްވާ ކަމަށެވެ.

ހަނިމާދޫގެ އާބާދީގައި ހިމެނެނީ 1938 މީހުންނެވެ.