އަތޮޅު ކައުންސިލް ލޯންޗްގައި ރައީސް ނަޝީދު ކުރެއްވި ކެމްޕެއިން ދަތުރުތަކަށްވާ ފައިސާ ނުދައްކާ އޮތް މައްސަލައެއް ފެންމަތިވެއްޖެ

ރައީސް ނަޝީދު ކެމްޕެއިންގައި ހދ އަތޮޅު ލޯންޗު ބޭނުން ކުރެއްވުމަށްފަހު ހދ އަތޮޅު ކައުންސިލް އިދާރާއަށް ފައިސާ ނުދައްކާ އޮތް މައްސަލައެއް ފެންމަތި ވެއްޖެ އެވެ.

ރައީސް މުހައްމަދު ނަޝިދާއި އެޕާޓީގެ އިސްބައެއް ބޭފުޅުން ހއ، ހދ ގެ ބައެއް ރަށްތަކަށް މިއަހަރުގެ މެއި މަހުގެ 18 ވަނަ ދުވަހު ކުރެއްވި ކެމްޕެއިން ދަތުރުތަކުގައި ބޭނުން ކުރި ހދ އަތޮޅު ކައުންސިލު އިދާރާގެ ބެލުމުގެ ދަށުގައި އޮންނަ “މާރެސް” ލޯންޗުގެ ދަތުރުތަކަށްވާ 14000 ރުފިޔާ ނުދައްކާ އޮތްކަން މިނޫހަށް ވަރަށް މުއުތަބަރު ގޮތެއްގައި ވަނީ އެނގިފައެވެ.

މިދަތުރުތަކުގައި ރައީސް ނަޝީދު ވަޑައިގެންނެވީ ކުޅުދުއްފުއްޓަށާއި ހަނިމާދޫ އަދި ހއ 3 ރަށް ކަމަށްވާ ކެލާ، ފިއްލަދޫ އަދި ބާރަށަށެވެ.

މިކަމާ ގުޅިގެން އެމްޑީޕީގެ އުތުރުގެ ކެމްޕެއިން ކޯޑިނޭޓަރ ޝިފާ މުހައްމަދަށް ގުޅާލުމުން ވިދާޅުވީ ރައީސް ނަޝީދު ކެމްޕެއިން ކުރެއްވުމަށް ބޭނުން ކުރި ލޯންޗަކަށް ފައިސާ ނުދައްކާ އޮތް ކަމެއް އެގިވަޑައިނުގަންނާވާ ކަމަށާއި ފައިސާ ނުދައްކާ އެއްވެސް ބިލެއް ވާނަމަ އެކަން އަންގާލުމުން ފައިސާ ވަގުތުން ދައްކަވާނެ ކަމަށެވެ.

ރައީސް ނަޝީދުގެ ވެރިކަމުގައި އެޑިކޭޝަނުން މިނިސްޓަރުކަން ވެސް ކުރައްވާފައިވާ ޝިފާ ވިދާޅުވީ އެމްޑީޕީ އަކުން ފައިސާ ނުދައްކާ ބިލުތަކެއް، ވަކިން ހާއްސަކޮށް ލޯންޗުގެ ބިލްތައް ނުހުންނާނެ ކަމަށާއި އެމްޑީޕީ އަކީ ބިލުތަކަށް އެންމެ ފުރަތަމަ ފައިސާ ދައްކާ ޕާޓީކަން ކުޅުދުއްފުށީ ރައްޔިތުންނަން އެނގޭނެ ކަމަށެވެ.

އެހެންނަމަވެސް މާރެސް ލޯންޗަށް ފައިސާ ނުދައްކާ މައްސަލައިގައި ވަކި އެއްޗެށް ދަންނަވަން އެނގޭނީ އެކަން ސާފު ކުރެއްވުމަށްފަހު ކަމަށް ޝިފާ ވިދާޅުވި އެވެ.

މިދަތުރުތަކުގެ ކުރިން ވެސް އަދި ފަހުން ވެސް ރައީސް ނަޝީދު ވަނީ އެ ލޯންޗުގައި ހއ، ހދ އަދި ށ ގެ ރަށްތަކަށް ވަޑައިގެންފައެވެ. އެހެންނަމަވެސް އެދަތުރުތަކުގެ ފައިސާ ކައުންސިލް އިދާރާއަށް ދައްކާފައި ވެއެވެ. އެގޮތުން ހަމަ މިއަހަރުގެ މެއި މަހު 11 ވަނަ ދުވަހު ރައީސް ނަޝީދު އެލޯންޗުގައި ވަނީ ކުޅުދުއްފުށި، ހަނިމާދޫ، ދިއްދޫ، އިހަވައްދޫ، އަދި މިލަންދޫ އަށް ވަޑައިގެންފަ އެވެ. އަދި އެދަތުރަށް ވާ 25000 ރުފިޔާ ވަނީ ކައުންސިލް އިދާރާ އަށް ދައްކާފައެވެ.

އަދި މިހުސްވި ޖުލައި މަހު 25 ވަނަ ދުވަހު ހދ އަތޮޅުގެ ރަށްތަކަށް ރައީސް ނަޝިދު ކުރެއްވި ކެމްޕެއިން ދަތުރުފުޅުގައި ވެސް ބޭނުން ކޮށްފައިވަނީ މިލޯންޗެވެ. އެ ދަތުރަށް ހަރަދުވި 16400 ރުފިޔާ ވެސް ވަނީ ކައުންސިލް އިދާރާ އަށް ދައްކާފަ އެވެ.

ލޯންޗު ދަތުރަކަށް ދައްކަން ޖެހޭ ފައިސާ މިއަދުގެ މެންދުރާ ހަމައަށް ނުދައްކާ އޮތްކަން މި ނޫހަށް ކަށަވަރުވެފައި ވީނަމަވެސް، އަތޮޅު ކައުންސިލުގެ ރައީސް ވިދާޅުވީ އެމްޑީޕީން ކޭމްޕޭނުގައި ބޭނުންކުރި ލޯންޗުގެ ބިލްތައް ދައްކާފައިވާ ކަމަށެވެ. ކައުންސިލުގެ ރައީސް ވިދާޅުވީ އެމްޑީޕީން ބަރާބަރަށް ބިލް ދައްކަމުން ދާ ކަމަށާއި އެހެންނަމަވެސް ސަރުކާރުގެ ވުޒާރާތަކުން ދައްކަންޖެހޭ އެތައް ބިލެއް މިހާރުވެސް ނުދައްކާ އޮތް ކަމަށެވެ.