ވައިކަރަދޫ ފިހާރައަކުން ވަގަށް ނަގާފައިވާ ތަކެތި ހޯދާ 2 ކުޑަކުއްޖަކު ފުލުހުން ހައްޔަރުކޮށްފި

ހދ ވައިކަރަދޫ ފިހާރައަކުން ވަގަށް ނަގާފައިވާ ތަކެތި ހޯދާ 2 ކުޑަކުއްޖަކު ފުލުހުން ހައްޔަރުކޮށްފި އެވެ.

މި މައްސަލައާ ގުޅިގެން ފުލުހުން ހައްޔަރުކޮށްފައިވަނީ  15 އަހަރުގެ ފިރިހެން ކުއްޖަކާއި 16 އަހަރުގެ ފިރިހެން ކުއްޖެއް ކަމަށްކަމަށް އެފަރާތުން ހާމަކުރެއެވެ. އަދި  އިއްޔެ  މިމައްސަލާގައި ފުލުހުން ހައްޔަރުކުރި  25 އަހަރުގެ މީހާ ބަންދުގައި ބަހައްޓައިގެން ތަހުގީގު ކުރިއަށް ގެންދިއުމަށް ކުޅުދުއްފުށި މެޖިސްޓަރޭޓް ކޯޓުން ވަނީ 15 ދުވަހުގެ މުއްދަތެއް ވަނީ ދީފައެވެ.

ވައިކަރަދޫގެ ފިހާރައެއްގެ ދޮރު ހަލާކުކޮށްލައިގެން ވައްކަން ކޮށްފައިވާކަމަށް މިމަހުގެ 4 ވަނަ ދުވަހު ފުލުހުންނަށް ހުށައެޅުނު މައްސަލައަކާއި ގުޅިގެން 3 މީހަކު ހައްޔަރުކޮށްފައިވާއިރު މި 3 މީހުންވެސް  ފުލުހުންގެ ބެލުމުގެ ދަށަށް ގެނެސްފައިވަނީ ހދ. ކުޅުދުއްފުށި ޕޮލިސް ސްޓޭޝަނުގައި މަސައްކަތްކުރާ ފުލުހުން ވައިކަރަދޫއަށް ގޮސް އެރަށުންނެވެ.

ވައިކަރަދޫ ފިހާރައިން ވަގަށް ނަގާފައިވާ ތަކެތީގެ ތެރޭގައި ހިމެނެނީ ސިނގިރޭޓް ކާޓޫނާއި ސުޕާރި ފޮއްޓާއި ޗުވިންގަމް ފުޅީގެ އިތުރުން ރެޑް ބުލް ފަދަ ބުއިންތައް ހިމެނޭއިރު މިފިހާރައިން ވަގަށް ނަގާފައިވާ ތަކެތީގެ އަގު 4000 ރުފިޔާއަށް އަރާކަމަށް ފުލުހުން ހާމަކުރެއެވެ.

ވައިކަރަދޫ ފިހާރައިން ވަގަށް ނަގާފައިވާ ތަކެތި ފުލުހުން ހޯދާފައިވަނީ މި މައްސަލައިގެ ތުހުމަތުގައި ފުލުހުންގެ ބެލުމުގެ ދަށަށް ގެނެސްފައިވާ މީހުން ދިރިއުޅެމުން ދިޔަ ގޭ ގެއިންނާއި ފަޅު ގޯތިތަކުގެ އިތުރުން މީހުން ދިރި ނޫޅޭ ސަރަހައްދު ތަކުގައި ގޯނި ގޯންޏަށް އަޅާ ރައްކާކޮށްފައިވަނިކޮށް ކަމަށް ފުލުހުން މައުލޫމާތުދެއެވެ.

ވައްކަމުގެ މި މައްސަލަ  ކުޅުދުއްފުށި ޕޮލިސް ސްޓޭޝަނުން މިހާރު އަންނަނީ ތަހުގީގު ކުރަމުނެނެވެ.