އެސްޓީއޯ މަސް ރޭހުގެ ޗެމްޕިއަންކަން ހދ އަތޮޅު ކައުންސިލުގެ ޓީމު ހޯދައިފި

އެސްޓީއޯ މަސްރޭހުގެ ޗެމްޕިއަންކަން ހދ އަތޮޅު ކައުންސިލުގެ ޓީމު ހޯދައިފި އެވެ.

އެސްޓީއޯ ނޯތު ޑިސްޓްރިބިއުޝަން ސެންޓަރުން އިންތިޒާމު ކޮށްގެން އިއްޔެ ބޭއްވި މި މަސްރޭހުގެ ޗެމްޕިއަންކަން ހޯދި ހދ އަތޮޅު ކައުންސިލުގެ ޓީމުން 58.56 ކިލޯގެ މަސް ބާނާފައިވާއިރު، ދެވަނަ މަގާމު ހޯދި މިތުރު ކޮމްޕެނީގެ ޓީމުން ބާނާފައިވަނީ 42.78 ކިލޯގެ މަހެވެ.

41 މަސް ބާނައިގެން އެންމެ މޮޅު މަސްވެރިޔާގެ މަގާމު ހޯދާފައިވަނީ ހދ އަތޮޅު ކައުންސިލު ޓީމުގެ އަހުމަދު ހަސަނެވެ. އަދި އެންމެ ބަރު މަސް ބޭނި މިތުރު ކޮމްޕެނީގެ މުހަންމަދު ރިޝްވާން ބޭނި މަހުގައި 6.06 ކިލޯ ހުއްޓެވެ. މި ދެމަސްވެރިންނަށް ފިލިޕްސް ގްރިލަރއެއް އެސްޓީއޯގެ ފަރާތުން ވަނީ ދީފައެވެ.

ކުޅުދުއްފުށީ ހިއްކި ސަރަހައްދުގައި ލައިވް ބޮޑުބެރާއެކު، ރޭ ނަތީޖާ ފާޅުކުރުން ބޭއްވި މި މުބާރާތުގެ ޗެމްޕިއަން ޓީމަށް 5000ރ. އަދި ދެވަނަ ޓީމަށް 3000ރ. ގެ ފައިސާގެ އިނާމެއް އެސްޓީއޯގެ ފަރާތުން ވަނީ ދީފައެވެ.

މި މުބާރާތުގައި ހދ އަތޮޅު ތައުލީމީ މަރުކަޒާއި ދިރާގު ކުޅުދުއްފުށީ ބުރާންޗުންނާއި، ކަސްޓަމްސް، ހދ އަތޮޅު ކައުންސިލް ގެ އިތުރުން  ޕޮލިސް، ބޭންކު އޮފް މޯލްޑިވްސް ކުޅުދުއްފުށީ ބުރާންޗް، މިތުރު އަދި އާޕޮއިންޓު ކޮމްޕެނީ އިން ވަނީ ބައިވެރިވެފައެވެ.