ވަތަނިއްޔާ އޮންލައިން ވެބްސައިޓް މެދުވެރިކޮށް ބިލަށް ފައިސާ ދެއްކުމުގެ ހިދުމަތް ފަށައިފި

ވަތަނިއްޔާގެ ކަސްޓަމަރުންނަށް އޮންލައިންކޮށް ބިލަށް ފައިސާ ދެއްކޭނެ ހިދުމަތެއް އެ ކުންފުނިން ތައާރަފް ކޮށްފި އެވެ.

“ވަތަނިއްޔާ އޮންލައިން” ގެ ނަމުގައި ތައާރަފް ކުރި މިހިދުމަތުގެ ސަބަބުން މިހާރު ވަތަނިއްޔާ ކަސްޓަމަރުންނަށް ކޮންމެ ވަގުތެއްގައި ކޮންމެ ތަނެއްގައި ހުރެގެން ބިލަށް ފައިސާ ދެއްކޭނެ އެވެ. އަދި ވަތަނިއްޔާ އޮންލައިންނަށް ސްމާޓްފޯނު އަދި ސްމާޓް ޑިވައިސްތައް މެދުވެރިކޮށް ޒިޔާރަތްކޮށް ފައިސާ ދެއްކޭނެ ކަމަށް އެކުންފުނިން މައުލޫމާތު ދެއެވެ.

ވަތަނިއްޔާއިން މައުލޫމާތު ދޭ ގޮތުގައި މި ހިދުމަތުގެ ސަބަބުން މިހާރު ގިނަ ވަގުތު ކިޔުގައި މަޑުނުކޮށް ވަތަނިއްޔާގެ ވެބްސައިޓް މެދުވެރިކޮށް ބިލަށް ފައިސާ ދައްކާ ލެވޭނެ އެވެ. ވަތަނިއްޔާއިން މިހިދުމަތް ފޯރުކޮށްދެނީ ބޭންކް އޮފް މޯލްޑިވްސްގެ ޕޭމަންޓްގޭޓްވޭ މެދުވެރިކޮށެވެ.

ވަތަނިއްޔާގެ ބިލްތަކަށް ފައިސާ ދެއްކުމަށް ވަންނަން ޖެހެނީ ވަތަނިއްޔާގެ ވެބްސައިޓްގެ ސެލްފް ކެއަރ އަށެވެ.

ވަތަނިއްޔާގެ ބިލްތަކަށް ފައިސާ ދެއްކުމަށް ތަފާތު ގޮތްތައް ވަނީ ތައާރަފް ކޮށްފަ އެވެ. އޭގެ ތެރޭގައި ބޭންކް އޮފް މޯލްޑިވްސްގެ ބްރާންޗްތަކާއި ޕޯސްޓް އޮފީހުގެ ބްރާންޗްތަކާއި ބީއެމްއެލް ޑައިރެކްޓް ޑެބިޓް އަދި އިންޓަނެޓް ބޭންކިން މެދުވެރިކޮށް ދެއްކޭ އިރު، ވަތަނިއްޔާގެ ސެލްފް ޕޭމަންޓް ކިއޮސްކްތަކުން ވެސް ފައިސާ ދެއްކެ އެވެ. ވަތަނިއްޔާގެ ސެލްފް ޕޭމަންޓް ކިއޮސްކެއް ކުޅުދުއްފުށީގައި ވެސް ހުރެއެވެ.