ފަހުގެ ހަބަރު: ކުޅުދުއްފުށީ ހޮސްޕިޓަލުގެ މުވައްޒަފުންގެ މުޒާހަރާ ނިންމާލައިފި

10:58

ކުޅުދުއްފުށީ ހޮސްޕިޓަލުގެ މުއައްޒަފުން ކުރިއަށް ގެންދިޔަ މުޒާހަރާ ނިންމާލައިފި އެވެ. މުޒާހަރާ ކުރަމުން ދިޔަ މުއައްޒަފަކު ބުނީ، މިއަދު މުޒާހަރާ ނިންމާލީ ހެލްތް މިނިސްޓްރީން މާދަމާ ވަކި ޖަވާބެއް ދޭނެ ކަމަށް ބުނުމުން ކަމަށެވެ.

މީގެ ގަޑިއެއްހާއިރު ކުރިން ފެށިގެން ކުޅުދުއްފުށީ ހޮސްޕިޓަލުގެ މެނޭޖްމެންޓާއެކު ކުޅުދުއްފުށީ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެމްބަރުންވަނީ ބައްދަލުވުމެއް ބާއްވާފައެވެ. އެބައްދަލުވުމުގައި ހޮސްޕިޓަލުގެ ގަޑިތަކަށް ގެނައި ބަދަލާ ގުޅިގެން ހިދުމަތް ހޯދުމަށް އަންނަ މީހުންނަށް ދިމާވާ ދަތިތަކާބެހޭ ގޮތުން ވަރަށް ދިގުކޮށް މަޝްވަރާކޮށްފައި ވެއެވެ.

މުޒާހަރާގެ ބައިވެރިއަކު ބުނީ މާދަމާވެސް މިނިސްޓްރީން ރަނގަޅު ޖަވާބެއް ނުލިބިއްޖެނަމަ އަލުން އިހުތިޖާޖަކަށް ނިކުންނަން ޖެހިދާނެ ކަމަށެވެ.

10:40

މުޒާހަރާ ކުރިއަށްދާއިރު، ހޮސްޕިޓަލުގެ ހިދުމަތްތަކަށް ވަނީ ކޮންމެވެސް ވަރެއްގެ ލަސްކަމެއް އައިސްފައެވެ. އެގޮތުން ބައެއް ވޯޑު ތަކުގައި އެންމެ ނަރުހެއް ހިދުމަތް ދެމުންދާއިރު، މިއަދުވެސް ގިނަ އަދަދެއްގެ ބަޔަކު ޑޮކްޓަރަށް ދައްކަން އައިސް ތިބި ކަމަށް އެތަނުގައި ހަރަކާތްތެރިވާ ކުޅުދުއްފުށި އޮންލައިންގެ ރިޕޯޓަރުން މައުލޫމާތު ދެއެވެ.

މުޒާހަރާގައި ބައިވެރިވި ބައެއް ނަރުހުން ވޯޑުތަކަށް ގޮސް ހިދުމަތް ދޭން ފަށާފައިވާ ކަމަށްވެސް މައުލޫމާތު ދެއެވެ.

10:30

ހޮސްޕިޓަލްގެ މުވައްޒަފުން މުޒާހަރާ ކުރަމުންދާއިރު، ކައުންސިލްގެ ނައިބު ރައީސް ފާރޫގު މުޙައްމަދާއި ކައުންސިލްގެ ބައެއް މެމްބަރުން އެސަރަހައްދަށް ވަޑައިގެން މުޒާހަރާގެ ބައިވެރިންނާ ވަނީ ބައްދަލުކޮށްފައި.

10:10

ކުޅުދުއްފުށީ އޮންލައިން އިން ދެންނެވި ސުވާލަކަށް ޖަވާބު ދެއްވަމުން ހޮސްޕިޓަލްގެ އެކްޓިންގ މެނޭޖަރ މުޙައްމަދު ހަސަން ވިދާޅުވީ، ޑިއުޓީއަށް ގެނައި ބަދަލު ގެނެސްފައި ވަނީ ހެލްތު މިނިސްޓްރީ އިން އެގޮތަށް އަންގާފައި ވާތީ އެވެ. އަދި މުވައްޒަފުންގެ ހުރި ކަންބޮޑުވުންތައް މިނިސްޓްރީއަށް މިހާރު އަންގާފައި ވާނެ ކަމަށާއި އަވަސް ޖަވާބެއް ލިބޭނެ ކަމަށް އުއްމީދު ކުރައްވާ ކަމަށެވެ. އަދި މެނޭޖްމަންޓުން ބޭނުންވަނީ ރައްޔިތުންނަށާއި މުވައްޒަފުންނަށް ލުއިފަސޭހަ ގޮތްތައް ހޯދައިދިނުން ކަމަށެވެ.

10:00

މުޒާހަރާ ކުރަމުންދާ މުވައްޒަފުންގެ ތެރެއިން ސީނިއަރ ބައެއް މުވައްޒަފުން މެނޭޖްމަންޓާ ބައްދަލުކޮށްފި. އަދި އެމީހުންގެ ޑިމާންޑްތައް ހުށަހަޅައިފި.

9:45

ކުޅުދުއްފުށީ ރީޖަނަލް ހޮސްޕިޓަލްގެ މުވައްޒަފުންގެ މުޒާހަރާގައި ހޮސްޕިޓަލްގައި މަސައްކަތް ކުރާ ގިނަ ނަރުހުންތަކެއް ވަނީ ބައިވެރިވެފައި. އަދި ޑިއުޓީގައި ތިބި ނަރުހުން ވެސް ވަނީ ބައިވެރިވެފައި. މީގެ އިތުރުން ކުޅުދުއްފުށީ އަންހެނުންގެ ކޮމިޓީގެ ރައީސާ އާއި އެކޮމިޓީގެ ބައެއް މެމްބަރުންގެ އިތުރުން ރައްޔިތުންގެ ތެރެއިން ބަޔަކުވެސް ހަރަކާތްތެރިވޭ.

މުޒާހަރާ ކުރަމުންދަނީ ކުޅުދުއްފުށީ ރީޖަނަލް ހޮސްޕިޓަލްގެ އޮފީސް އިމާރާތުގެ ކައިރީގައި. އަދި އިމާރާތުގެ ތެރެއަށް ވަދެވެސް ބައެއް މީހުން ވަނީ ޝުއޫރު ފާޅުކޮށްފައި. ތަފާތު ޝުއޫރުތައް ލިޔެފައިވާ ބޯޑުތައް ވެސް މުޒާހަރާ ކުރަމުންދާ މީހުން އެބަ ގެންގުޅޭ. އެމީހުން ވަނީ ހޮސްޕިޓަލްގެ މެނޭޖްމަންޓްގެ އިސްތިއުފާއަށް ގޮވާފައި.

9:00

ކުޅުދުއްފުށީ ރީޖަނަލް ހޮސްޕިޓަލްގެ މުވައްޒަފުންގެ ޑިއުޓީ ގަޑި ތަކަށް ގެނައި ބަދަލާ ގުޅިގެން އެކަމާ ހިތްހަމަ ނުޖެހިގެން ހޮސްޕިޓަލްގެ މުވައްޒަފުން މުޒާހަރާ ކުރަން ފަށައިފި އެވެ.

ހޮސްޕިޓަލުގެ މުވައްޒަފެއް މިނޫހަށް މައުލޫމާތު ދެމުން ބުނީ މުޒާހަރާ ކުރަން ނިންމީ  އަލަށް ޑިއުޓީ ކުރަން އެންގި އިރު ދަންވަރު ޝިފްޓްގައި 10 ގަޑި އިރު ޑިއުޓީ  ކުރަންޖެހޭތީ ކަމަށެވެ. އަދި މިނިސްޓްރީގެ ސައުކިލާ އަކުން އަންގައިގެން ވިޔަސް ސިވިލް ސަރވިސް ގަވައިދާ ހިފާލަށް 10 ގަޑި އިރަށް މުވައްޒަފުން ލައްވާ ޑިއުޓީ ކުރަން ހޮސްޕިޓަލްގެ މެނޭޖްމަންޓަށް ނޭންގޭނެ ކަމަށް އޭނާ ބުންޏެވެ.

އޭނާ ބުނީ ޑިއުޓީއަށް ގެނައިބަދަލާ ގުޅިގެން އަތޮޅު ތެރެއިން އަންނަ އެތައް ބަޔަކަށް އުނދަގޫވެ، މުޅި ދުވަހު އެމީހުން ހޮސްޕިޓަލްގައި އުޅެންޖެހޭކަމަށެވެ.

އަދި މިމުޒާހަރާއަކީ އަލަށް ޑިއުޓީ އަށްގެނައި ބަދަލުތަކާމެދު މުވައްޒަފުން ހިތްހަމަނުޖެހޭކަން މެނޭޖްމަންޓަށް ހާމަކޮށް ދިނުމަށް ކުރާ ސުލްހަވެރި މުޒާހަރާ އެއްކަމަށާއި މިމުޒާހަރާގައި ހޮސްޕިޓަލްގެ ހުރިހާ މުވައްޒަފުން ވެސް ބައިވެރިވާ ކަމަށެވެ.