ޕީޕީއެމްގެ ޖަލްސާއަށް މީހުން ގޮވައިގެން އައި ކުރިނބީ ދޯންޏެއް ކުޅުދުއްފުށީ ނެރު ފައިކައްޓަށް އުރިއްޖެ

މިރޭ ޕީޕީއެމްގެ ފަރާތުން ކުޅުދުއްފުށީގައި ބާއްވާ ޖަލްސާއަށް މީހުން ގޮވައިގެން އައި ކުރިނބީ ދޯންޏެއް ކުޅުދުއްފުށީ ނެރު ފައިކައްޓަށް އުރިއްޖެ އެވެ.

މިރޭ ގާތްގަނޑަކަށް 7:45 ހާއިރު ކުޅުދުއްފުއްޓަށް އައި ކުރިނބީ “ހިދުމަތް” ދޯނި ނެރު ފައިކައްޓަށް އުރި ވަނީ ބީހިފައެވެ. ނަމަވެސް ދޯނިން ދަތުރުކުރި އެންމެ މީހެއް ފިޔަވާ އެއްވެސް މީހަކަށް ގެއްލުމެއް ލިބިފައިވާކަމަށް މައުލޫމާތު ލިބިފައެއް ނުވެއެވެ. ގެއްލުން ލިބުނު އަންހެން މީހާވަނީ ފުލުހުންގެ ވެހިކަލެއްގައި ކުޅުދުއްފުށީ ރީޖަނަލް ހޮސްޕިޓަލަށް ގެންގޮސްފަ އެވެ.

ވަގުތަކީ ދިޔަވަރު ހިކި ވަގުތަކަށް ވުމާއެކު ދޯނި ނެރުމައްޗަށް ބީހުމުން ދޯނީގައި ތިބި ބައެއް މީހުން ވަނީ ފަރުމައްޗަށް ފައިބައި ބޮޑުހިލަތައް މަތީގައި ހިނގާފައި ފާލަމާހަމައަށް ގޮސްފައެވެ. މީހުން ސަލާމަތް ކުރުމަށް ފުލުހުންނާއި އާއްމު ރައްޔިތުން ވަނީ ހަރަކާތްތެރި ވެފައެވެ.

މިހާދިސާގައި ދޯނީގެ ފަށަނަށް ވަރަށް ބޮޑަށް ވަނީ ގެއްލުން ލިބިފަ އެވެ.

މި ދޯނިން ވަނީ ސާޅީހަކަށް މީހުން ދަތުރު ކޮށްފަ އެވެ. އަދި ދޯނީގެ އިތުރަށް އެހެން ދޯންޏެއް ވެސް މިރޭވަނީ ކުރިނބީ އިން އައިސްފަ އެވެ.