ޕީޕީއެމްގެ ސަރުކާރެއްގައި ކުޅުދުއްފުށީގައި އެއާޕޯޓެއް އަޅާނަން: ޔާމީން

ފީޕީއެމްގެ ސަރުކާރެއްގައި ކުޅުދުއްފުށީގައި ޑޮމެސްޓިކް އެއާޕޯޓެއް އަޅާނެ ކަމަށް އެޕާޓީގެ ރިޔާސީ ކެނޑިޑޭޓް އަބުދުﷲ ޔާމީނު ވިދާޅުވެއްޖެ އެވެ.

“ބޮޑުތިލަދުންމަތީގެ ކުރިއެރުން” މިނަމުގެ ކުރިއަށް މިރޭ ކުޅުދުއްފުށީގައި ބޭއްވި ޕީޕީއެމްގެ ޖަލްސާ ގައި ޔާމީނު ވިދާޅުވީ އެޕާޓީގެ ވެރިކަމުގެ ފުރަތަމަ 2 އަހަރު ތެރޭގައި ކުޅުދުއްފުށީގައި އެއާޕޯޓެއް އަޅާނެ ކަމަށާއި އަދި ހއ، ހދ، އަދި ށ އަތޮޅު ހިމެނޭ ގޮތަށް ބޮޑުތިލަދުންމަތި ސަރަހައްދަކީ އިޤުތިޞާދީ ތަރައްޤީގެ ނާރެހަކަށް ހައްދަވައި ދެއްވާނެ ކަމަށެވެ.

“އަޅުގަނޑުމެންގެ ސަރުކާރެއްގައި އަޅުގަނޑުމެން މި ވިސްނަނީ ކުޅުދުއްފުއްޓަކީ އުތުރުގެ ސަރަހައްދުގައި އަދި މުޅި ރާއްޖެއަށް ބަލާލި ނަމަވެސް، މާލެ ނަގާފައި، ސަރަހައްދީ ނާރެހުގެ ދެ ރަށެއް ނެގޭ ކަމަށްވަންޏާ ކުޅުދުއްފުއްޓަކީ އެއް ރަށް. އަޅުގަނޑުގެ ހިސާބުތަކުން ދައްކާގޮތުގައި ކުޅުދުއްފުށީގެ އުތުރުކޮޅުގައި އެބަ އެއާޕޯޓެއް އަޅަން ޖެހޭ. އަޅުގަނޑުމެންގެ ސަރުކާރުގެ ފުރަތަމަ ދެ އަހަރުގެ ތެރޭގައި ކުޅުދުއްފުށީގެ ރައްޔިތުންނަށް އަދި މި ރަށަށް ޒިޔާރަތްކުރާ ރައްޔިތުންނަށް، ކުޅުދުއްފުއްޓަށް އައިސް ވިޔަފާރީގެ ފައިދާ އާއި ނަފާ ހޯދަން ބޭނުންވާ މީހުންނަށް ފަސޭހަކަމާ އެކީގައި ދަތުރުކުރެވެންވާނެ” ޔާމީން ވިދާޅުވި އެވެ.

ޔާމީނު ވިދާޅުވީ ޕީޕީއެމްގެ ވެރިކަމެއްގައި ޒުވާނުންނަން އިސްކަންދެއްވާނެ ކަމަށާއި އެގޮތުން ޒުވާނުންނަން ހާއްސަ ކޮށްގެން 500 އަށް ވުރެގިނަ ޕްރޮގުރާމުތައް ކޮންމެ އަހަރަކުވެސް ހިންގާނެ ކަމަށެވެ. އަދި ފަސް އަހަރުގެ ތެރޭގައި ރިސޯޓް ހަދަން ދޫކުރާނެ ރަށްތަކުގެ 30 ޕަސެންޓް ރަށްތައް ހުރީ ބޮޑުތިލަދުންމަތީގައި ކަމަށް ޔާމީން ވިދާޅުވި އެވެ. އަދި އެއީ އެސަރައްހަދުގެ ގާތްގަނޑަކަށް 15 ވަރަކަށް ރިސޯޓުކަން ފާހަގަ ކުރައްވައި ޔާމީން ވިދާޅުވީ އެއީ އެބޮޑުތިލަދުންމައްޗަށް ހުޅުވިގެންދާ 7500 ވަޒީފާ ކަމަށެވެ.

ހަތަރު ސަތޭކައެއްހާ މީހުން ބައިވެރިވި މިޖަލްސާގައި ޔާމީނު ވަނީ ބޮޑުތިލަދުންމަތި ސަރައްހަދަށް ބޮޑެތި ވަޢުދު ތަކެއް ވެވަޑައިގެންފަ އެވެ. މިޖަލްސާއަށް ހދ އަތޮޅުގެ ހަތް ރަށަކުން މީހުން ގެނެސްފައި ވެއެވެ. އެއީ މަކުނުދޫ، ކުރިނބީ، ނޮޅިވަރަމް، ވައިކަރަދޫ، ނެލައިދޫ އަދި ކުމުންދޫ އިންނެވެ.

ކުޅުދުއްފުއްޓަށް ޕީޕީއެމް އިން މިއަދު ކުރި ދަތުރުގައި އެޕާޓީގެ ރައީސް މައުމޫން އަބްދުލް ގައްޔޫމާއި އެޕާޓީގެ ރިޔާސީ ކެނޑިޑޭޓްގެ ރަނިންގ މޭޓް ޑރ. މުހައްމަދު ޖަމީލް އަހުމަދު ބައިވެރިވެ ވަޑައިގަންނަވެއެވެ.