ހަތިމެއްގައި ރައްކާކޮށްފައި ހުރި ފައިސާތަކެއް ވަގަށް ނަގައިފި

ހދ ނޮޅިވަރަމްގައި މީހަކު ހަތިމެއްގެ ތެރޭގައި ރައްކާކޮށްފައި ހުރި 3000 ރުފިޔާ ވަގަށް ނަގައިފި އެވެ.

މިނޫހަށް މައުލޫމާތު ދެއްވަމުން ފުލުހުންގެ މީޑިޔާ އޮފިޝަލު ވިދާޅުވި މިމަހުގެ 8 ވަނަ ދުވަހު ފުލުހުންނަށް ހުށައެޅުނު ރިޕޯޓަކާ ގުޅިގެން މިމައްސަލަ ބަލަމުންދާކަމަށެވެ. އަދި އެދުވަހު ކުޅުދުއްފުށީ ޕޮލިސް ސްޓޭޝަންގައި މަސައްކަތް ކުރައްވާ ފުލުހުންގެ ޓީމެއް ނޮޅިވަރަމަށް ޒިޔާރަތްކޮށް މީހުންނާ ސުވާލުކޮށް ހަދާފައިވާ ކަމަށެވެ. އަދި މިކަމާ ގުޅިގެން އެއްވެސް މީހަކު ހައްޔަރުކޮށްފައި ނުވާކަމަށްވެސް ފުލުހުން މައުލޫމާތު ދެއްވައެވެ.

މިނޫހަށް މައުލޫމާތު ދެމުން ނޮޅިވަރަމުގެ މީހަކު ބުނީ މިމަހުގެ 9 ވަނަ ދުވަހުގެ އިރުއޮއްސުނު އިރު ފުލުހުންގެ ޓީމެއް ނޮޅިވަރަމަށް ޒިޔާރަތްކޮށް 10 ވަނަ ދުވަހުގެ ހެނދުނާ ހަމައަށް ވަނީ މައްސަލަ ތަހުޤީޤު ކުރުމަށް އެކި ފަރާތްތަކާ ސުވާލުކޮށްފަ އެވެ. އަދި މި ފައިސާތައް ވަގަށް ނެގިކަމަށް 18 އަހަރު ނުފުރޭ ދެކުއްޖަކު އެއްބަސްވެފައިވާ ކަމަށާއި އެހެން ނަމަވެސް ބެހެއްޓުނުތަން ނޭނގޭކަމަށް ބުނުމުން އެކުދިންގެ މައިން ބަފައިން އޭގެ ބަދަލުގައި ފައިސާގެ ވެރިފަރާތަށް 3000 ރުފިޔާ ދީފައިވާ ކަމަށްވެސް މިނޫހަށް މައުލޫމާތު ދިން ނޮޅިވަރަމްގެ މީހަކު ބުންޏެވެ.

މިމައްސަލަ މިހާރު ދަނީ ފުލުހުން ތަހުގީގު ކުރަމުންނެވެ.