ކުޅުދުއްފުށީ ގެއަކުން ވައްކަންކުރި މީހަކު 3 އަހަރާއި 6 މަސް ދުވަހަށް ޖަލަށް ލުމަށް ހުކުމް ކޮށްފި

ކުޅުދުއްފުށީ ގެއަކުން ވައްކަންކުރި މީހަކު 3 އަހަރާއި 6 މަސް ދުވަހަށް ޖަލަށް ލުމަށް ހުކުމް ކޮށްފި އެވެ.

ގެއެއްގެ ތެރޭގައި އޮތް 07 ފޫޓުގެ ދަގަނޑެއް ވަގަށް ގެންގޮސްފައިވާ މައްސަލައާ ގުޅިގެން ކުޅުދުއްފުށީ މެޖިސްޓްރޭޓް ކޯޓުން ހުކުމްކޮށްފައިވަނީ ކުޅުދުއްފުށީ ލަންދޫގެ، މުޙައްމަދު އިބްރާހީމް (27އ) ގެ މައްޗަށެވެ.

މި ހުކުމުގައި މުހައްމަދު އެ ދަނގަޑު ވަގަށް ނެގިކަމަށް އިއުތިރާފް ވެފައިވާތީ ވައްކަންކުރުމުގެ ކުށުން ކުށްވެރިވެއްޖެކަމަށް ކަނޑައަޅައި، މިކުށުގެ ޢުޤޫބާތެއްގެގޮތުން ޤާނޫނުލްޢުޤޫބާތުގެ 131 ވަނަ މާއްދާގެ (ހ) ގެ ދަށުން، މިއީ މުޙައްމަދު އިބްރާހީމް ވައްކަންކުރުމުގެ ކުށް ސާބިތުވި ދެވަނަ ފަހަރުކަމުގައިވާތީ 2 އަހަރުގެ މުއްދަތަށް ޖަލަށްލުމަށްވަނީ ކަނޑައަޅާފަ އެވެ. އަދި މި ވައްކަންކޮށްފައި ވަނީ ޖަމާޢަތް ހަދައިގެންކަމުގައިވާތީ ޤާނޫނުލްޢުޤޫބާތުގެ 136 ވަނަ މާއްދާގެ ދަށުން 6 މަސްދުވަހަށް ޖަލަށްލުމަށާއި، މި ވައްކަންކޮށްފައި ވަނީ މީހުން ދިރިއުޅޭ ތަނަކުންކަމަށްވާތީ، ޤާނޫނުލްޢުޤޫބާތުގެ 138 ވަނަ މާއްދާގެ ދަށުން 1 އަހަރު ދުވަހަށް ޖަލަށްލުމަށެވެ. އެހެންކަމުން ޖުމްލަ 3 އަހަރާއި 6 މަސްދުވަހުގެ މުއްދަތަށް މުޙައްމަދު އިބްރާހީމް ޖަލަށްލުމަށް ޙުކުމްކުރީކަމަށްވެސް މި ހުކުމުގައި ވެއެވެ.

މި މައްސަލައިގެ ތަޙުޤީޤު ނިންމައި މުޙައްމަދު އިބްރާހީމްގެ މައްޗަށް ދަޢުވާކުރުމަށް ޕްރޮސެކިޔުޓަރ ޖެނެރަލްގެ އޮފީހަށް ފޮނުވާފައިވަނީ މިދިޔަ އަހަރުގެ ޑިސެމްބަރު މަހުގެ 23 ވަނަ ދުވަހުއެވެ.

މީނާއަކީ ވައްކަމާއި ފޭރުން އަދި މަސްތުވާތަކެތީގެ ގިނަ މައްސަލަތަކުގެ ރިކޯޑް އޮންނަ މީހެއްވެސްމެ އެވެ.