ހުއްދަނެތި ގެއަކަށް ވަތް ކުޅުދުއްފުށީ މީހަކު އަރުވާލުމަށް ހުކުމް ކޮށްފި

ހުއްދަނެތި ގެއަކަށް ވަތް ކުޅުދުއްފުށީ މީހަކު 3 މަހަށް އަރުވާލުމަށް ހުކުމް ކޮށްފި އެވެ.

މި މައްސަލައިގައި ހުކުމް ކޮށްވަނީ ހދ.ކުޅުދުއްފުށި، ޓޯޓަލްގެ، އަޙްމަދު ނަޢީމް (33އ) ގެ މައްޗަށެވެ.

އަޙްމަދު ނަޢީމް ގެ މައްޗަށް ހދ.ކުޅުދުއްފުށި މެޖިސްޓްރޭޓް ކޯޓުން ޙުކުމްކޮށްފައިވަނީ 2011 މެއި 22 ވަނަދުވަހުގެ ދަންވަރު 00:30 ހާއިރު ހދ.ކުޅުދުއްފުށި ގެއަކަށް، އެގޭގެ މީހުން ނިދާފައި ތިއްބާ، ގޭގެ ވެރިފަރާތުގެ ހުއްދަ ނެތި އެގެއަށް ވަދެފައިވާ މައްސަލައާ ގުޅިގެންނެވެ.

މި މައްސަލާގައި ހދ.ކުޅުދުއްފުށި މެޖިސްޓްރޭޓް ކޯޓުންކޮށްފައިވާ ޙުކުމުގައި ބަޔާންކޮށްފައިވަނީ އަޙްމަދު ނަޢީމްގެ މައްޗަށް ދަޢުލަތުންކޮށްފައިވާ ދަޢުވާއަށް އިންކާރުކޮށްފައިވީ ނަމަވެސް 2011 މެއި 22 ވަނަދުވަހުގެ ރޭ ދަންވަރުގެ ވަގުތެއްގައި ހދ.ކުޅުދުއްފުށި ގެއަަކަށް، އެގޭގެ ވެރިފަރާތުގެ ހުއްދަނެތި ވަދެފައިވާކަމަށް ދަޢުލަތުން ހުށަހެޅި ހެކީންގެ ހެކިބަހުން  ޝަރީޢަތަށް ސާބިތުވާތީއެވެ.

މީނާގެ މައްޗަށް ހުކުމް ކޮށްފައިވަނީ އަމުރަށް ނުކިޔަމަންތެރިވުމުގެ ކުށުން އަޙްމަދު ނަޢީމް ކުށްވެރިވެއްޖެކަމަށް ކަނޑައަޅައި މިއީ އަޙްމަދު ނަޢީމްގެ މައްޗަށް ޖިނާޢީ ކުށެއް ސާބިތުވި ދެވަނަ ފަހަރުކަމަށްވާތީ، މިކުށުގެ ޢުޤޫބާތެއްގެގޮތުން ޤާނޫނުލްޢުޤޫބާތުގެ 88 ވަނަ މާއްދާގެ (ހ) ގެ ދަށުން އަޙްމަދު ނަޢީމް 3 (ތިނެއް) މަސްދުވަހުގެ މުއްދަތަށް އަރުވާލަން ޙުކުމްކުރީކަމަށެވެ.

މި މައްސަލައިގެ ތަޙުޤީޤު ނިންމައި އަޙްމަދު ނަޢީމްގެ މައްޗަށް ދަޢުވާކުރުމަށް ޕްރޮސެކިޔުޓަރ ޖެނެރަލްގެ އޮފީހަށް ފޮނުވާފައިވަނީ 2011 ޑިސެމްބަރު 12 ވަނަދުވަހުއެވެ. އަޙްމަދު ނަޢީމް ގެ މައްޗަށް މީގެކުރިން ބަދުއަޚްލާޤީ ޢަމަލު ހިންގި މައްސަލައެއް 2005 ވަނަ އަހަރު ސާބިތުވެ 6 މަސްދުވަހަށް ޖަލަށްލުމަށް ވަނީ ޙުކުމްކޮށްފައެވެ.