އެމްޑީޕީ ބަޔަކު ގައުމީ އިއްތިހާދުގެ ޖަގަހައަށް ގައު އުކާ ހަމަނުޖެހުން އުފައްދަން މަސައްކަތްކުރި: ޖީއަޕީ ކުޅުދުއްފުށީ ގޮފި

ކުޅުދުއްފުށީ ހުރި ގައުމީ އިއްތިހާދުގެ ޖަގަހައަކަށް އެމްޑީޕީގެ ސަޕޯޓަރުން ތަކެއް ގާ އުކާއިފި ކަމަށް ގައުމީ އިއްތިހާދު ޕާޓީގެ ކުޅުދުއްފުށީ ގޮފިން ބުނެފި އެވެ.

ގައުމީ އިއްތިހާދު ޕާޓީގެ ކުޅުދުއްފުށީ ގޮފީގެ ތަރުޖަމާނު މުޖުތަބާ އަހުމަދު ވިދާޅުވީ ރޭ އެމްޑީޕީގެ ސަޕޯޓަރުން ތަކެއް ޖީއަޕީގެ ޖަގަހަ ތެރެއަށް ވަދެ ސައުންޑު މަޑު ކުރުމަށް އެދުނު ކަމަށާއި އެހެންނަމަވެސް އެކަމަކީ ޖަގަހަ އެއްގަ ހިނގާ ސިޔާސީ ހަރަކާތަކަށް ވާތީ އެކަން ކުރެވެން ނެތް ކަމަށް ބުނެފައިވާ ކަމަށެވެ.

މުޖުތަބާ ވިދާޅުވީ އެމްޑީޕީގެ ސަޕޯޓަރުން 2 ފަހަރު މަތިން ޖަގަހަ ތެރެއަށް ވަދެގަނެފައިވާ ކަމަށާއި ފަހުން ޖަގަހަށް ވަން 4 ވަރަކަށް މީހުންގެ ގުރޫޕުން ހަޑި ހުތުރު ބަހުން މުއާމަލާތް ކޮށްފައިވާ ކަމަށެވެ. އަދި ސައުންޑުގެ އަޑު މަޑު ނުކުރުމުން ޖަގަހަށް ގާ އުކާ، ޖަގަހަ ކައިރީގައި މިރުސް ދުން އަޅާ، ތަފާތު އެކި އުނދަގޫތައް ކުރިކަމަށެވެ.

“100 ޕަސެންޓް ގެރެންޓީ ރޭ ގަ ގައު އުކީ އެމްޑީޕީގެ ސަޕޯޓަރުން ކަން.” މުޖުތަބާ ވިދާޅުވި އެވެ.

އޭނާ ވިދާޅުވީ ކުޅުދުއްފުށީ ގައި ރައީސް ވަހީދަށް ކެމްޕެއިން ކޮށްދިނުމަށް ތިބީ ޒުވާނުން ކަމަށާއި އެޒުވާނުންނެއް ބަޔަކު ބިރު ދެއްކިޔަސް ފަހަތަކަށް ނުޖެހޭނެ ކަމަށެވެ.

ރޭ 10 ޖަހާ އެހާއިރު ހިނގި މިކަންތަކާ ގުޅިގެން އެމްޑީޕީ ކުޅުދުއްފުށީ އުތުރު ދާއިރާގެ ނައިބު ރައީސް އަލީ މުހައްމަދު ވިދާޅުވީ އެމްޑީޕީގެ ސަޕޯޓަރުންނެތް އެއްވެސް ތަނަކަށް ގަލެއް ނޫކާނެ ކަމަށާއި އެއީ އެއްބަޔަކު އަނެއް ބައެއްގެ ބޮލުގައި ތަފާތު ބަދުނާމު އެޅުވުމަށް ސިޔާސީ ވާދަވެރިން ކުރާ ކަންކަން ކަމަށެވެ .އަދީ ރޭ އެމްޑީޕީން ހެދިގޮނޑުދޮށުގައި ބޭއްވި ހާއްސަ ޖަލްސާ އަޑު އެހުމަށްޓަކައި ގިނަ އަދަދެއްގެ ބަޔަކު ބަންޑާރަ މައިދާނަށް (އެމްޑީޕީގެ ސިޔާސީ ހަރަކާތް ހިންގާ ތަނެއް) ދިޔަ ކަމަށާއި އެހެންނަމަވެސް ޖީއަޕީ ޖަގަހައިގައި ލަވަ ޖަހާ އަޑު ގަދަވުމުގެ ސަބަބުން އެޖަލްސާ ގައި ދައްކާ ވާހަކަ ނީވުން ކަމަށެވެ.

އަލީ އިތުރަށް ވިދާޅުވީ ރައީސް ވަހީދުގެ ސަރުކާރުން މަސައްކަތް ކުރައްވަމުން ދަނީ ކުޅުދުއްފުށީގައި ހަމަނުޖެހުން އުފައްދަން ކަމަށާއި ބަންޑާރަ މައިދާނަކީ ކުރިއްސުރެ އެމްޑީޕީގެ ހަރަކާތްތައް ހިންގާ ސަރައްހަދެއް ކަމުން އެސަރައްހަދުގައި ޖީއަޕީގެ ޖަގަހަ ހަދައިގެން އުޅެނީ ހަމަނުޖެހުން އުފެދުމަށް ކަމަށެވެ.

” ސަރުކާރުން މަސައްކަތް ކުރަމުން ދަނީ ކުޅުދުއްފުށީގައި ހަމަނުޖެހުން ހިންގުމަށް. އެހެންވެ އެމްޑީޕީ މީހުން ސިޔާސީ ހަރަކާތް ހިންގާ ސަރަހައްދަށް އެމީހުން (ޖީއަޕީ) ސަޕޯޓަރުން އައިސްގެން ޖަގަހަ ހަދައިގެން ބާރަށް ލަވަ އެޖަހަނީ. ކުޅުދުއްފުއްޓަކީ ޒަމާނުއްސުރެއް ހޮޅުއަށިތަކެއް ހަދާ އެތަންތަނުގައި ވަކި ސިޔާސީ ހަރަކާތްތައް ހިންގަމުން ދާ ރަށެއް. އެގޮތުން ޕީޕީއެމް ހޮޅުއަށި ކިޔާ އެމީހުންގެ ސިޔާސީ ހަރަކާތް ހިންގާ ސަރައްހަދެއް ވެސް އޮވޭ.” އަލީ ވިދާޅުވި އެވެ.

ރައީސް ވަހީދުގެ ކެމްޕެއިން ޖަގަހަ ހުންނަނީ ކުޅުދުއްފުށީ ބަންޑާރަމައިދާނާ ދިމާ، އަމީރު އަމީން ސްކޫލު އުތުރުގައެވެ. އަދި ކޮންމެ ރެއަކުހެން އެމްޑިޕީގެ ސިޔާސީ ހަރަކާތް ހިންގާ ބަނޑާރަ މައިދާނުގައި އާއި ޖީއައިޕީގެ މިޖަގަހައިން އަޑު ގަދަކޮށް އެއްބަޔަކު އަނެއް ބަޔަކަށް ވުރެއް ބާރަށް ލަވަ ޖެމުމަށް މަސައްކަތް ކުރެއެވެ.