މަކުނުދޫގައި ސާދަ އަހަރުގެ އަންހެންކުއްޖަކާ ގަދަކަމުން ބަދުއަޚްލާޤީ އަމަލު ހިންގި މައްސަލައެއްގައި މީހަކު ހައްޔަރު ކޮށްފި

ސާދަ އަހަރުގެ އަންހެންކުއްޖަކާ ގަދަކަމުން ބަދުއަޚްލާޤީ އަމަލު ހިންގި މައްސަލައެއްގައި މަކުނުދޫން މީހަކު ހައްޔަރު ކޮށްފި އެވެ.

މި މައްސަލައާ ގުޅިގެން ހައްޔަރުކޮށްފައިވަނީ 42 އަހަރުގެ ފިރިހެނެއް ކަމަށް ފުލުހުން ހާމަކުރެއެވެ. އަދި މީނާ ހައްޔަރުކޮށްފައިވަނީ ކުޅުދުއްފުށީގައި ހުންނަ ފެމިލީ އެންޑް ޗިލްޑްރަންސް ސާރވިސް ސެންޓަރުގެ ފަރާތުން މި މަހުގެ 19 ވަނަ ދުވަހު ފުލުހުންނަށް ހުށަހެޅި މައްސަލައާ ގުޅިގެން ކަމަށްވެސް ފުލުހުން މައުލޫމާތު ދެއެވެ.

މައްސަލައާ ގުޅިގެން ކޯޓު އަމުރެއްގެ ދަށުން އޭނާ ފުލުހުންގެ ބެލުމުގެ ދަށަށް ގެންގޮސްފައިވަނީ ހޯމަ ދުވަހުގެ ރޭ 23:30 ހާއިރު އެވެ.

މި މައްސަލަ ކުޅުދުއްފުށީ ޕޮލިސް ސްޓޭޝަނުން މިހާރު ގެންދަނީ ތަޙުޤީޤު ކުރަމުންނެވެ.