ޖުމްހޫރީ ގުޅުމުގެ ވެރިކަމެއްގައި ވަޒީފާގައި ތިބެ ޕޭލީވްގައި ކިޔެވޭނެ އިންތިޒާމެއް ހަމަޖައްސާނަން: ގާސިމް

ވަޒީފާގައި އުޅޭ ކުދިން އިތުރަށް ކިޔަވަން ބޭނުންނަމަ ވަޒީފާގައި ތިބެ ޕޭލީވްގައި ކިޔެވޭނެ އިންތިޒާމު ޖުމްހޫރީ ގުޅުމުގެ ވެރިކަމެއްގައި ހަމަޖައްސާ ދެއްވާނެ ކަމަށް ޖުމްހޫރީ ގުޅުމުގެ ރިޔާސީ ކެނޑިޑޭޓް ގާސިމް އިބްރާހީމް ވިދާޅުވެއްޖެ އެވެ.

ރޭ ޖުމްހޫރީ ކޯލީޝަނުން ކުޅުދުއްފުށީގައި ބޭއްވި ޖަލްސާގައި ވާހަކަ ދައްކަވަމުން ގާސިމް ވިދާޅުވީ މުދިމުންގެ މުސާރަ ބޮޑުކޮށް މުދިމުންނަށް ޑިގްރީ ފެންވަރަށް ކިޔެވޭނެ ނިޒާމެއް ގާއިމުކުރާ ކަމަށެވެ. މުދިމުންނަކީ ތަމްރީނު ލިބިފައިވާ ކަމުގެ ތައުލީމު ލިބިފައިވާ ބަޔަކަށް ހައްދަވާނެ ކަމަށްވެސް ގާސިމް ވިދާޅުވި އެވެ.

500 އެއްހާ މީހުން ބައިވެރިވި މި ޖަލްސާގައި ވާހަކަ ދައްކަވަމުން ގާސިމް ވިދާޅުވީ މިހާރު ކުޅުދުއްފުށީ ސަރަހައްދީ ބަނދަރަށް 1000 ޓަނުގެ ބޯޓަށް ވެސް ނުވަދެވޭ ކަމަށާއި އެ ކޯލީޝަނުގެ ވެރިކަމެއްގައި ކުޅުދުއްފުށީ ބަނދަރަށް 6000 ޓަނުގެ ބޯޓު ވަދެވޭވަރަށް ތަރައްޤީ ކޮށްދެއްވާނެ ކަމަށެވެ.

ގާސިމް ވިދާޅުވީ ކުޅުދުއްފުއްޓަކީ އާބާދީ ބޮޑު އަދި ބިމުގެ ދަތިކަން ފޯރާފައިވާ ރަށަކަށް ވާތީ އެކަން ހައްލުކުރުމަށް ވަރަށް ބޮޑަށް މަސައްކަތް ކުރައްވާނެ ކަމަށެވެ. އެގޮތުން ކުޅުދުއްފުށީ ގޯތި ދިނުމުގެ އުޞޫލުތަކެއް ކަނޑައަޅުއްވާނެ ކަމަށް ވިދާޅުވި އެވެ.

ކުޅުދުއްފުއްޓަކީ ބޭރު ދަތުރުކުރާ މީހުންގެ އާބާދީ ބޮޑު ރަށެއްކަން ފާހަގަކުރައްވާ ގާސިމް ވިދާޅުވީ ޖުމްހޫރީ ކޯލީޝަނުގެ ވެރިކަމެއްގައި ކުޅުދުއްފުށީ މެރިޓައިމް ޓްރޭނިން އިންސްޓިޓިއުޝަނެއް ހައްދަވައި ދެއްވާނެ ކަމަށެވެ. އަދި ވަޒީފާގެ ފުރުޞަތު އިތުރުކޮށް “މަގުމަތީގައި ތިބޭ” ޒުވާނުންނަކީ މުޖުތަމައަށް ބޭނުންތެރި ބަޔަކަށް ހައްދަވާނެ ކަމަށް ގާސިމް ވިދާޅުވި އެވެ.

ރޭ ކުޅުދުއްފުށީ ލެކިއުޓް ފިހާރަ ކުރިމަތީގައި އޮންނަ ހުސްބިމުގައި ބޭއްވި ޖުމްހޫރީ ގުޅުމުގެ ޖަލްސާގައި ގާސިމްގެ އިތުރުން ރަނިންގ މޭޓް ޑރ. ހަސަން ސައީދުވެސް ވާހަކަ ދެއްކެވި އެވެ. މި ޖަލްސާއަށް ހދ ހަނިމާދޫ، ނޮޅިވަރަމް، ނޮޅިވަރަންފަރު، ކުމުންދޫ، ވައިކަރަދޫ އަދި ހިރިމަރަދޫން ވެސް މީހުން އައިސްފައި ވެއެވެ.