ގައުމައިގެން ކުރިއަށް ކޯލިޝަނުން ބޭއްވި ސްޓޭޖް ޝޯއެއްގެ ތެރެއަށް އެމްޑީޕީގެ ބަޔަކު ވަދެ ހަމަނުޖެހުން ހިންގައިފި

ގައުމައިގެން ކުރިއަށް ކޯލިޝަނުން ހދ ނޭކުރަންދޫގައި  ބޭއްވި ސްޓޭޖް ޝޯއެއްގެ ތެރެއަށް އެމްޑީޕީގެ ބަޔަކު ވަދެ ހަމަނުޖެހުން ހިންގަން މަސައްކަތް ކޮށްފި ކަމަށް އެ ކޯލިޝަނުން ބުނެފި އެވެ.

ގައުމައިގެން ކުރިއަށް ކޯލިޝަނުގެ ކުޅުދުއްފުށީ ކޯޑިނޭޓަރ މުހައްމަދު ވިދާޅުވީ އެ ކޯލިޝަނުގެ ސްޓޭޖް ޝޯ ނޭކުރަންދޫގައި ކުރިއަށް ދަނިކޮށް އެމްޑީޕީގެ ސަޕޯޓަރުންތަކެއް އެ ސަރަހައްދަށް ވަދެ ހަޅޭލަވާ ހަޑިހުތުރު ބަހުން މުއާމަލާތް ކޮށްފައިވާ ކަމަށާއި އަދި އެޕާޓީގެ އަންހެން ސަޕޯޓަރެއްގެ ގަޔަށް އަތްލާ މާރާމާރީ ހިންގާފައިވާ ކަމަށެވެ.

މުހައްމަދު ވިދާޅުވި ގޮތުގައި އެރަށުގެ ބޯޅަ ދަނޑުގައި ޝޯ ދެމުން ދަނިކޮށް އެމްޑީޕީއަށް ތާއީދުކުރާ 10 ވަރަކަށް މީހުންގެ ގުރޫޕަކުން މެގަފޯނު ހިފައިގެން ވަދެ އަޑުގަދަކޮށް ހަމަނުޖެހުން ހިންގަން ފެށުމުން އެމީހުންތައް އެސަރަހައްދުން ފޮނުވާލެވުނީ އެވަގުތު އެތަނުގައި ތިބި އެރަށުގެ އިސް ބޭފުޅުންކޮޅެއް އެމީހުންނާ ވާހަކަ ދައްކާ އިތުރު ހަމަނުޖެހުމަކަށް ފުރުޞަތު ނުދިނުމުންނެވެ.

ރިޔާސީ އިންތިހާބަށް ކެމްޕެއިން ކުރުމުގެ ގޮތުން ގައުމައިގެން ކުރިއަށް ކޯލިޝަނުން ހދ އަތޮޅުގެ ބައެއް ރަށްތަކުގައި ބޮޑުބެރު ޝޯ ތަކެއް އަންނަނީ ބާއްވަމުންނެވެ. އެގޮތުން ރޭ ނޭކުރަންދޫގައި ޝޯ ދީފައިވަނީ ކުޅުދުއްފުށީ ޑީއެލްޑީ މިއުޒިކް ގްރޫޕާއި ކުޅުދުއްފުށީ ދައްސޫރަ ބޮޑުބެރު ގްރޫޕުންނެވެ.

އިންތިހާބުގެ ފޯރި ގަދަވަމުން އަންނައިރު ބައެއްކަހަލަ ހަމަނުޖެހުންތައް އަންނަނީ އިތުރުވަމުންނެވެ. އެގޮތުން ޖުމްހޫރީ ގުޅުމުގެ ފަރާތުން ކުޅުދުއްފުށީގައި ބޭއްވި ޖަލްސާއަށްވެސް އެމްޑީޕީގެ ބަޔަކު ވަނީ ހުރަސް އަޅަން މަސައްކަތްކޮށްފަ އެވެ.