ށ. މިލަންދޫއަށް ނަގޫ ރޯޅިއެއް އަރައި ބޮޑެތި ގެއްލުންތަކެއް ވެއްޖެ

ށ. މިލަންދޫއަށް ނަގޫ ރޯޅިއެއް އަރައި ބޮޑެތި ގެއްލުންތަކެއް ލިބިއްޖެ އެވެ.

މިލަންދޫއަށް މިރޭ ގާތްގަނޑަކަށް 20:00 ހާއިރު އެރި މި ނަގޫ ރޯޅި އަރާފައިވަނީ އެރަށު ހުޅަނގު ފަރާތުންނެވެ.

މިހާދިސާގައި މިލަންދޫ ސްކޫލަށާއި ރަށުގެ ބައެއް ގެތަކަކަށް ގެއްލުން ލިބުނު އިރު ގިނަ ގަސްތަކަކަށްވެސް ގެއްލުންވެފައި ވެއެވެ.

ފުލުހުން މައުލޫމާތު ދޭ ގޮތުގައި މިހާދިސާގައި އެރަށު ސްކޫލުގެ އޭވީ ރޫމުގެ ޓިނުތައް އުކާލައި ސްކޫލުގެ ވަށާފާރުގެ ބައެއް ވެއްޓިފައިވެއެވެ. އަދި ރަށުގައި ބެނާތަކެއް ދެމުމަށްޓަކައި ހަރުކޮށްފައިހުރި ދަނގަޑުތަކެއް ވެއްޓި މަގުމަތީގައި ހުރި ސައިކަލުތަކަކަށް ގެއްލުންތަކެއް ވަނީ ވެފައެވެ. ފުލުހުން ބުނިގޮތުގައި މިހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.

މިހާދިސާގައި އެރަށަށް ލިބުނު ގެއްލުމުގެ ތަފްސީލީ މައުލޫމާތުތައް ކައުންސިލުގެ ފަރާތުން ހޯދަމުން އަންނަކަމަށް މައުލޫމާތު ލިބެއެވެ. އަދި ލިބުނު ގެއްލުންތަކުގެ ތަފްސީލު މިރޭ ލިބޭގޮތްވަނީ ނުވެފައެވެ.

މިއަދަކީ އުތުރުގެ ގިނަ ރަށްރަށަށް ވިއްސާރަވެ ވައިގަދަ ދުވަހެކެވެ. މާލެއަށްވެސް މެންދުރު ފަހުން ފެށިގެން ވައިގަދަވެ ބޯކޮށް ވާރޭ ވެހިފައި ވެއެވެ.