ނޮޅިވަރަމް ކައުންސިލްގެ ބައި އިލެކްޝަން ޕީޕީއެމްގެ ކެންޑިޑޭޓު ކާމިޔާބުކޮށްފި

މިއަދު ބޭއްވި ހދ ނޮޅިވަރަމް ކައުންސިލްގެ ބައި އިލެކްޝަން ޕީޕީއެމްގެ ކެންޑިޑޭޓު މަރިޔަމް ހަބީބް (މަރީ) ކާމިޔާބުކޮށްފި އެވެ.

ނޮޅިވަރަމް ކައުންސިލުން ހުސްވެފައިވާ ގޮނޑިއަށް މެންބަރަކު އިންތިޚާބުކުރުމަށް މިއަދު ބޭއްވި މި އިންތިޚާބު މަރިޔަމް ހަބީބު ކާމިޔާބު ކޮށްފައިވަނީ ޖުމްހޫރީ ޕާޓީގެ ކެންޑިޑޭޓު އިބްރާހިމް ނަސީރާއި ވާދަކޮށް 59 ވޯޓުގެ ތަފާތަކުންނެވެ. މިއިންތިޚާބުގައި 1508 މީހުންނަށް ވޯޓު ލުމުގެ ހައްގު ލިބިފައިވާއިރު ވޯޓު ދީފައިވަނީ ބާތިލް 23 ވޯޓާއެކު 839 މީހުންނެވެ.

މި އިންތިޚާބުގައި މަރިޔަމް ހަބީބަށް 434 ވޯޓު ލިބިފައިވާއިރު އިބްރާހިމް ނަސީރަށް ލިބިފައިވަނީ 382 ވޯޓެވެ. މިގޮތުން މާލޭގައި ބެހެއްޓުނު ވޯޓުފޮށިން 40 ވޯޓު މަރީ އަށް ލިބިފައިވާއިރު ނަސީރަށް ލިބިފައިވަނީ 2 ވޯޓެވެ. އަދި ނޮޅިވަރަމްގައި ބެހެއްޓި ދެ ފޮށީގެ ތެރެއިން ދެކުނު އަވަށުގެ ރައްޔިތުން ވޯޓުލުމަށް ބެހެއްޓި  ފޮށިން މަރީއަށް ވަނީ 304 ވޯޓު ލިބިފައެވެ. މިފޮށިން ނަސީރަށް 62 ވޯޓު ލިބުނު އިރު އުތުރު އަވަށުގެ މީހުންނަށް ބެހެއްޓުނު ފޮށިން 318 ވޯޓު ހޯދައިގެން ކުރިހޯދީ ނަސީރެވެ. މި ފޮށިން މަރީއަށް ލިބިފައިވަނީ 89 ވޯޓެވެ.

މި ބައި އިލެކްޝަނަކީ ނޮޅިވަރަމް ކައުންސިލުގެ ނައިބު ރައީސްގެ މަގާމުގައި ހުންނެވި އަލީ ނާޒިމް މިއަހަރުގެ ޖޫން މަހުގެ 20 ވަނަ ދުވަހު ކައުންސިލުން އިސްތިއުފާ ދެއްވުމާއި ގުޅިގެން ކައުންސިލަށް މެމްބަރަކު އިންތިހާބު ކުރުމަށް ބޭއްވި އިލެކްޝަނެކެވެ.

މި ބައި އިލެކްޝަނުގެ ވޯޓުލުން ކުރިއަށް ގެންގޮސްފައިވަނީ މިއަދު ހެނދުނު އަށަކުން ހަވީރު 4 ގެ ނިޔަލަށް ކުރީގެ މަސްޖިދުއް ޞުހާރުގައެވެ. މި އިންތިޚާބުގައި އެއްވެސް ކަހަލަ ހަމަނުޖެހުމެއް ހިނގާފައެއް ނުވެއެވެ.