އެންމެ މޮޅު މިއުޒިކް ވީޑިއޯ އަކަށް ޖަސްޓިންގެ މިރަރްސް

މިއުޒިކް އިންޑަސްޓްރީގައި މަގުބޫލުކަން ހޯދާފައިވާ އެމްޓީވީ ވީޑިއޯ އެވޯޑްސްގެ އެންމެ މޮޅު މިއުޒިކް ވީޑިއޯއަކަށް ޖަސްޓިން ޓިންބަލޭކްގެ “މިރަރްސް” އަށް ލިބިއްޖެ އެވެ.

ކާމިޔާބު 2 އަލްބަމަކަށްފަހު 2007 ވަނަ އަހަރު މިއުޒިކީ ދުނިޔެއާ ފެޔަށް ޖެހިލުމަށްފަހު، މިއަދު އަލުން މިއުޒިކުގެ ތެރެއަށް ވަދެ ޖަސްޓިން ވަނީ ދެ އަލްބަމެއް ރިލީސްކޮށްފަ އެވެ. އެގޮތުން އޭނާގެ “ސޫޓް އެންޑް ޓައީ” އަދި “މިރަރްސް” ވަނީ ރިކޯޑް އަދަދަކަށް ވިކިފަ އެވެ.

2007 ވަނަ އަހަރުގެ ފަހުން ޖަސްޓިން ފެނިފައިވަނީ ފިލްމީ ތަރިއެއްގެ ގޮތުގަ އެވެ. އެގޮތުން “ދަ ސޯޝަލް މީޑިއާ”، “ބޭޑް ޓީޗަރ”، “އިން ޓައިމް” އަދި “ފްރެންޑްސް ވިތް ބެނެފިޓްސް” ގައި ޖަސްޓިން ވަނީ ހަރަކާތްތެރި ވެފައެވެ.

އެމްޓީވީ ވީޑިއޯ މިއުޒިކް އެވޯޑްގައި އިތުރު އެވޯޑްތަކަށް ބަލާއިރު، ބެސްޓް މޭލް ވީޑިއޯ އަކަށް ހޮވިފައިވަނީ ބުރޫނޯ މާސްގެ “ލޮކްޑް އައުޓް އޮފް ހެވެން” އެވެ. އަދި ބެސްޓް ފީމޭލް ވީޑިއޯއަކަށް ހޮވުނީ ޓޭލަރ ސްވިފްޓްގެ “އައި ނިއު ޔޫ ވަރ ޓްރަބްލް” އެވެ. މީގެ އިތުރުން ބެސްޓް ޕޮޕް ވީޑިއޯ އަކަށް ސެލީނާ ގޮމޭޒްގެ “ކަމް އެންޑް ގެޓް އިޓް” ހޮވުނު އިރު، ހޫނުމޫސުމުގެ އެއްވަނަ ލަވައިގެ ގޮތުގައި ވަން ޑައިރެކްޝަންގެ “ބެސްޓް ސޯންގް އެވަރ” ވަނީ ހޮވިފަ އެވެ.

މީގެ އިތުރުން އެންމެ 32 އަހަރުގެ ޖަސްޓިން ޓިމްބަލޭކަށް ރޭ ވަނީ ލައިފް ޓައިމް އެޗީވްމަންޓް އެވޯޑް ވެސް ލިބިފައެވެ. — ބީބީސީ