ފޭދޫ ކައުންސިލް އިދާރާގެ ޚިދުމަތްތައް ނުދެވި ރަށުގެ މުނިސިޕަލް މަސައްކަތްތައް ހުއްޓުމަކަށް

ށ ފޭދޫ ކައުންސިލް އިދާރާގެ ފޯނު ބިލު ކަނޑާލާ، ކަރަންޓު ބިލަށް ތިންލައްކަ އަށް ވުރެ ގިނަ ރުފިޔާ އަރާ، އެފައިސާ ނުދެއްކި، ކައުންސިލް އިދާރާއިން ކުރާ ރަށުގެ މުނިސިޕަލް މަސައްކަތްތައް ހުއްޓުމަކަށް އައިސްފި އެވެ.

ކުޅުދުއްފުށީ އޮންލައިނަށް މައުލޫމަތު ދެއްވަމުން ށ ފޭދޫ ކައުންސިލް މެމްބަރު އާދަމް މުހައްމަދު ވިދާޅުވީ ކައުންސިލް އިދާރާގެ ފޯނު ބިލް ނުދައްކާ ތާ  ގާތްގަނޑަކަށް 6 މަސް ވެފައިވާއިރު މިހާރު ވަނީ ފޯނުގެ ޚިދުމަތް ކަނޑާލާފައިފަ ކަމަށާއި ކަރަންޓު ބިލު ތަކަށް މަގު ބައްތި ތަކާއި މިސްކިތްތަކުގެ ބިލު ތަކާއެކު ތިންލައްކަ ހަތްދިހަހާހަށް ވުރެ ގިނަ ރުފިޔާ އަރާ  ބިލް ތައް ނުދެއްކިވާކަމަށެވެ.

އޭނާ ވިދާޅުވީ ފިނޭންސް މިނިސްޓްރީން ފައިސާ ޖަމާނުކޮށްދިނުމުގެ ސަބަބުން ކައުންސިލް އިދާރާއިން ކުރާ ރަށުގެ އިޖުތިމާއީ މަސައްކަތް ތައް ވެސް ހުއްޓިފައިވާކަން ފާހަގަ ކުރައްވަމުން އާދަމް ވިދާޅުވީ  ރަށުތެރެ ކުނި ކެހުން ވެސް ފައިސާ ނުލިބިގެން ހުއްޓާލާފައިވާކަމަށާއި ކުނިކެހުން ހުއްޓާލުމުން ރަށުތެރެ ފެންނަނީ ވަރަށް ހަޑި ކޮށް ކަމަށެވެ. އަދި  ކައުންސިލް އިދާރާގެ ސެކިއުރިޓީ ބެލެހެއްޓުން ވެސް ފައިސާގެ ތާށިކަމާ ހެދި ހުއްޓިފައިވާކަން އޭނާ ފާހަގަ ކުރެއްވި އެވެ.

ކައުންސިލް މެމްބަރު އާދަމް ވިދާޅުވީ އެއިދާރާއިން ހިންގަމުން އަންނަ ޕްރީސްކޫލުގެ މުވައްޒަފުންނަށް ވެސް ސަރުކާރުން މުސާރަ ޖަމާ ނުކޮށްދޭތާ ތިންމަސް ވެފައިވާކަމަށާއި އެހެންނަމަވެސް އެތަނުގެ މުވައްޒަފުންގެ ރަގަޅު ކަމުން އެތަން ބަންދު ނުކޮށް ކުރިއަށް ދާކަމަށެވެ. އަދި ފިނޭންސް މިނިސްޓްރީން އެދެވޭ ޖަވާބެއް ދީފައި ނުވާ އިރު، މިނިސްޓްރީން ބުނަނީ އަބަދުވެސް މިއަންނަ ހަފްތާ ފައިސާ ޖަމާ ކޮށްދޭނެކަމަށެވެ. އެހެން ނަމަވެސް ފައިސާ ޖަމާކޮށްދީފައި ނުވާކަމަށް ކައުންސިލުން ބުނެއެވެ.

ށ.ފޭދޫ ކައުންސިލް އިދާރާއިން އިންޓަނެޓް ކަނޑާލާފައިވުމުގެ ސަބަބުން، މުވައްޒަފުން މަސައްކަތައް ކުރަމުން ގެންދަނީ އަމިއްލަ މޮޑަމް ގެނެސް ގެންނެވެ.

ށ .ފޭދޫ ކައުންސިލް އިދާރާގެ މުވައްޒަފުން އިއްޔެ ވަނީ ފައިސާ ލިބުމުގެ ދަތިތަކާއި، ހުރެ މަސައްކަތް ހުއްޓާލުމަށް ފަހު އިހުތިޖާޖު ވެސް ކޮށްފައެވެ.