ކުޅުދުއްފުށީގެ ދެ މިއުޒިކް ގްރޫޕަކަށް ރައީސް ވަހީދުގެ ޕާޓީން ލައްކައެއްހާ ރުފިޔާގެ މިއުޒިކް ސާމާނު ހަދިޔާކޮށްފި

ކުޅުދުއްފުށީގައި މިއުޒިކް ކުޅޭ ދެ ގުރޫޕަކަށް ރައީސް ވަހީދުގެ ޤައުމީ އިއްތިހާދު ޕާޓީން ލައްކައެއްހާ ރުފިޔާގެ އަގުހުރި މިއުޒިކް ކުޅޭ ސާމާނު ހަދިޔާކޮށްފި އެވެ.

ޤައުމީ އިއްތިހާދު ޕާޓީން އެހީތެރިވެދީފައިވަނީ ކުޅުދުއްފުށީ ޑީއެލްޑީ މިއުޒިކް ގުރޫޕަށާއި ކުޅުދުއްފުށީ ދައްސޫރަ ބޮޑުބެރު ގުރޫޕަށެވެ. އެގޮތުން ދައްސަޫރަ ބޮޑުބެރު ގުރޫޕަށް 14000ރ. އެމްޕެއް ހަދިޔާކޮށްފައި ވެއެވެ. އަދި ޑީއެލްޑީ މިއުޒިކު ގުރޫޕަށް 80000ރ. ގެ ސައުންޑް ސިސްޓަމެއް ހަދިޔާ ކޮށްފައެވެ.

ދައްސޫރަ ބޮޑުބެރު ގުރޫޕުން ބުނީ އެ ފަރާތުން ސިޔާސީ ހުރިހާ ޕާޓީ ތަކެއް ގާތު ވެސް އެމްޕެއް ހޯދުމަށް އެދުނު ކަމަށާއި ނަމަވެސް އެފާރާތުގެ އެދުމަށް އިޖާބަދީ، އެމްޕެއް ހަދިޔާ ކޮށްފައިވަނީ ހަމައެކަނި ޤައުމީ އިއްތިހާދު ޕާޓީން އެކަނި ކަމަށެވެ. އިތުރު އެއްވެސް ޕާޓިއަކުން ޖަވާބެއް ލިބިފައި ނުވާ ކަމަށެވެ.

ޑީއެލްޑީ ގުރޫޕުގެ ފަރާތުން މައުލޫމާތު ދެމުން އެގުރޫޕުގެ އިސް ފަރާތެއް ކަމަށްވާ އިބްރާހިމް މުހައްމަދު ބުނީ އެ ގުރޫޕުން ވެސް ސައުންޑް ސިސްޓަމެއް ހޯދުމަށް ހުރިހާ ޕާޓީތަކެއް ކައިރީގައި އެދުނު ކަމަށާއި އަދި ސައުންޑް ސިސްޓަމެއް ހަދިޔާ ކުރާ ޕާޓީއެއްގެ ފަހަތުގައި 2013 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމަށްޓަކައި ކެމްޕޭން ހަރަކާތްތަކުގައި ނިކުތުމަށް ބުނެފައި ވާނެކަމަށް އިބްރާހިމް ބުންޏެވެ. ނަމަވެސް އެދެވޭ ޖަވާބެއް ދީ ސައުންޑް ސިސްޓަމެއް އެ ފަރާތަށް ހަދިޔާ ކޮށްފައި ވަނީ ގައުމީ އިއްތިހާދު ޕާޓީން އެކަނި ކަމަށް އޭނާ ބުންޏެވެ.

ޤައުމީ އިއްތިހާދު ޕާޓީން ކުޅުދުއްފުށީގެ މިއުޒިކު ކުޅޭ ދެ ގުރޫޕަކަށް އެހީތެރިކަން ފޯރުކޮށްދީފައި ވާއިރު މި ދެ ގުރޫޕުން ވެސް ދަނީ އެ ޕާޓީގެ ކެމްޕޭން ހަރަކާތްތަކުގައި ބައިވެރިވަމުންކަން ފާހަގަ ކުރެވެއެވެ.