އަޅުގަނޑުގެ ތަސައްވުރަކީ ރާއްޖެ ނަމޫނާ ގައުމަކަށް ހެދުން: ރައީސް ވަހީދު

އަޅުގަނޑުގެ ތަސައްވުރަކީ ދިވެހި ރާއްޖެ ނަމޫނާ ގައުމަކަށް ހެދުން ކަމުގައި ރައީސް ވަހީދު ވިދާޅުވެއްޖެ އެވެ.

“ގައުމައިގެން ކުރިއަށް” ކޯލިޝަންގެ ކެމްޕެއިން ނިންމާލުމުގެ ގޮތުން ރޭ ހދ.ކުޅުދުއްފުށީގައި ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުން ރައީސް ވަހީދު ވިދާޅުވީ އެމަނިކުފާނުގެ ތަސައްވުރަކީ ރާއްޖެ އަކީ ނަމޫނާ ގައުމަކަށް ހަދާ ނަމޫނާ ޑިމޮކްރެސީ އެއް ގާއިމް ކޮށް، އިސްލާމީ ގައުމުތަކުގެ ތެރެއިން އެންމެ ފުރަތަމަ ޒަމާނީ ޑިމޮކްރެސީ ގާއިމްކުރާ ގައުމަކީ ދިވެހިރާއްޖެ ކަމުގައި ހެދުން ކަމަށެވެ.

ރައީސް ވަހީދު ވިދާޅުވީ  ރާއްޖެ އަކީ ދިވެހިންގެ ރީތި އާދަކާދަތަކާއި ރަނގަޅު އަހުލާގު ދަމަހައްޓައި އެއްބަޔަކު އަނެއް ބަޔަކަށް އޯގާތެރިކަމާއެކީގައި މުއާމަލާތުކުރާ، ސުލްހަވެރި އަމާން ގައުމެއް ކަމަށް ހެދުމާއި ރާއްޖެ އަކީ އިސްލާމީ ރިވެތި އަހުލާގުގެ ތެރެއިން އެކަކު އަނެކަކަށް އަޅާލާ ބަޔަކަށް ހެދުން އެއީ އެމަނިކުފާނު ތަސައްވުރެއްކަމަށެވެ.

ހއ، ހދ، ށ އަދި ރ އަތޮޅުން މީހުން ބައިވި މިޖަލްސާ ގައި ރައީސް ވަހީދު ވީދާޅުވި  ހޮނިހިރު ދުވަހު ބާއްވާ ރިޔާސީ އިންތިހާބަކީ ރައްޔިތުންނަށް ލިބޭ ރަނުގެ ފުރުސަތެއް ކަމަށާއި އެ ދުވަހު ދޭ ވޯޓަކީ ގައުމުގެ މިނިވަންކަމާއި ތަރައްގީ އަށް ދޭ ވޯޓެއް ކަމަށް ރައީސް ވަހީދު ވިދާޅުވި އެވެ. އަދި މީގެ އިތުރުން ދިވެހިންގެ ތެރޭގައި ހަމަހަމަކަން ގާއިމްކޮށް، އަދުލުވެރިކަމާއި އިންސާފުވެރިކަމާއެކު ގައުމުގެ ކަންކަން ކުރިއަށް ގެންދިއުމުގެ ފުރުސަތު އެ ވޯޓުން ލިބޭނެ ކަމަށް އެމަނިކުފާނު ވިދާޅުވި އެވެ.

ރޭ ޖަލަލުއްދީން ސްކޫލު ހޯލުގައި ބޭއްވި މިޖަލްސާ ގައި 700 – 800 ދެމެދު ގައި މީހުން ބައިވެރި ވިއެވެ. އަދި ޖަލްސާގެ ހޯލު ފުރިގެން ބޭރުގައި ވެސް މީހުން ތިބެވެ.