ކުޅުދުއްފުށީގައި ކައިވެނީގެ ބޭރުން 17 އަހަރުގެ އަންހެން ކުއްޖަކު ވިހައިފި

ކުޅުދުއްފުށީގައި ކައިވެނީގެ ބޭރުން ދުވަސްފުރާ 17 އަހަރުގެ އަންހެން ކުއްޖަކު ވިހައިފި އެވެ.

ކުޅުދުއްފުށީގައި ހުންނަ ފެމިލީ އެންޑް ޗިލްޑްރެންސް ސާވިސް ސެންޓަރުންވެސް ވަނީ ކުޅުދުއްފުށީގައި 17 އަހަރުގެ ކުއްޖަކު ވިހާފައިވާކަން މިނޫހަށް ކަށަވަރު ކޮށްދީފަ އެވެ.

މިކުއްޖާ ވިހާފައިވަނީ ކުޅުދުއްފުށީ ރީޖަނަލް ހޮސްޕިޓަލުގައި “ނޯމަލް ޑެލިވަރީ” އަކުން މިމަހުގެ 7 ވަނަ ދުވަހު ކަމަށް އާއިލާއިން މައުލޫމާތުދެ އެވެ. މިގޮތުން ވިހޭ އަންހެން ކުއްޖާ އާއި މައިމީހާގެ ހާލުވެސް ރަނގަޅު ކަމަށާއި އިއްޔެ ގެއަށް ފޮނުވާލާފައިވާ ކަމަށް އާއިލާއިން މައުލޫމާތުދެ އެވެ.

17އަހަރުގެ މި އަންހެން ކުއްޖާ ބަލިވެ އިން މައްސަލައާ ގުޅިގެން މިދިޔަ އޯގަސްޓު މަހުގެ ތެރޭގައި 22 އަހަރުގެ ޒުވާނަކު ފުލުހުން ވަނީ ހައްޔަރުކޮށްފަ އެވެ. މިގޮތުން މިމައްސަލާގައި ހައްޔަރުކުރި ކުޅުދުއްފުށީ، ސުހާނީ، އަހުމަދު ހަސަންގެ މައްޗަށް ދައުވާކުރުމަށް މިދިޔަ މަހުގެ 31 ގައި ޕީޖީއަށް ވަނީ ފޮނުވާފަ އެވެ.

ބަލިވެއިނދެ ވިހޭ ކުއްޖާ ވަނީ މާބަނޑުވިފަހުން ބަރާބަރަށް ހޮސްޕިޓަލަށް ދައްކަމުން ގޮސްފަ އެވެ. މި ދެމީހުންނަކީ ލޯބީގެ ގޮތުން ގުޅިގެން އުޅޭތާ ދުވަސްތަކެއް ވެފައިވާ ދެމީހުންނެވެ.