ވޯޓު ކަރުދާސް ޕްރިންޓްކުރި މައްސަލާގައި ހައްޔަރުކުރި ދެމީހުންގެ ބަންދުގެ މުއްދަތު ކްރިމިނަލް ކޯޓުން އިތުރު ކޮށްފި

ވޯޓު ކަރުދާސް ޕްރިންޓްކުރި ކަމުގެ ތުހުމަތުގައި ހައްޔަރުކުރި ދެމީހުންގެ ބަންދުގެ މުއްދަތު ކްރިމިނަލް ކޯޓުން އިތުރު ކޮށްފި އެވެ.

ވޯޓު ކަރުދާސް ޕްރިންޓްކުރި މައްސަލާގައި ފުލުހުން ހައްޔަރުކޮށްފައިވާ ކުޅުދުއްފުށި މާވިނަ، އަހުމަދު އާތިފާއި ކުޅުދުއްފުށީ ބެނިސަން، އަހުމަދު އަބުދުއްރަހްމާނުގެ ބަންދުގެ މުއްދަތަށް 10 ދުވަސް އިތުރުކޮށްފައިވަނި ރޭ ކްރިމިނަލް ކޯޓުގައި ބޭއްވި އަޑުއެހުމަކަށް ފަހު އެވެ. ކުރިން އެ ދެމީހުންގެ ބަންދުގެ މުއްދަތަށް ކުޅުދުއްފުށީ މެޖިސްޓްރޭޓް ކޯޓުން 3 ދުވަސް ވަނީ ޖަހާފައެވެ.

ވޯޓު ކަރުދާސް ޕްރިންޓްކުރި ކަމުގެ ތުހުމަތުގައި ކުޅުދުއްފުށިން ހައްޔަރުކުރި އާތިފަކީ ޤައުމީ ޔުނިވަރސިޓީގެ ކުޅުދުއްފުށީ ކެމްޕަހުގެ ސީނިޔާ އެޑްމިނިސްޓްރޭޓިވް އޮފިސަރެކެވެ. އޭނާއަކީ ކުރިން ކުޅުދުއްފުށީ ޕޯޓްސް ލިމިޓެޑްގެ މެނޭޖިންގ ޑިރެކްޓަރުކަން ކޮށްފައިވާ އަދި މިހާރު އެމްޑީޕީގެ ކުޅުދުއްފުށީ ކެމްޕެއިން މެނޭޖަރެވެ. އަދި އަހުމަދު އަބްދުއްރަހުމާނަކީ ކުޅުދުއްފުށީގެ އިމިގްރޭޝަން ސައިޓުގެ އިމިގްރޭޝަން އޮފިސަރެކެވެ.

މިމައްސަލާގައި މި ދެމީހުންގެ ދިފާއީ ވަކީލެއް ގޮތުގައި ހަމަޖައްސާފައިވަނީ ގާނޫނީ ވަކީލް އަބުދުﷲ ހަސީނެވެ.

މިމައްސަލައިގެ އިތުރު ތަހުގީގަށް މިދެމީހުން މާލެ ގެންގޮސްފައިވަނީ ހުކުރު ދުވަހުގެ ވަގުތެއްގަ އެވެ.

ރިޔާސީ އިންތިހާބު ބޭއްވި ދުވަހު މި ދެމީހުންގެ ތެރެއިން އާތިފް ހަރަކާތްތެރިވެފައި ވަނީ އަފީފުއްދީން ސްކޫލުގައި ބެހެއްޓި 8 ނަމްބަރު ވޯޓު ފޮށީގެ “މިނިވަން 97″ ގެ މޮނީޓަރެއްގެ ގޮތުގައެވެ. އަދި އަހުމަދު އަބްދުއްރަހީމް ހަރަކާތްތެރިވެފައި ވަނީ އަފީފުއްދީން ސްކޫލުގައި ބެހެއްޓި 6 ނަމްބަރު ވޯޓު ފޮށީގެ “މިނިވަން 97″ ގެ މޮނީޓަރެއްގެ ގޮތުގަ އެވެ.