ކުޅުދުއްފުށީ އިންޖީނުގެ އޮފީސް ފަޅާލާ ފައިސާއާއި ބައެއް ތަކެތި ވަގަށް ނަގައިފި

ކުޅުދުއްފުށީ އިންޖީނުގެ އޮފީސް ފަޅާލާ، އެތަނުން ރޭ ވައްކަން ކޮށްފި އެވެ.

ފެނަކަ ކޯޕަރޭޝަނުގެ ރީޖަނަލް މެނޭޖަރ އާދަމް މުހައްމަދު ވިދާޅުވީ އޮފީސް ތެރެއަށް ވަގު ވަދެފަ ވަނީ ކުޅުދުއްފުށި އިންޖީނުގެ އޮފީސް ބައިގެ ފާހާނާއެއްގެ ފެންލައިޓް ހަލާކު ކޮށްލައިގެން ކަމަށާއި މިހާނަތަން ބެލިބެލުމުން ފައިސާ މަދުކަމަށް ބެލެވޭ ކަމަށެވެ.

އެހެންނަމަވެސް މަދުވީ ކިހާ ފައިސާއެއްކަން މިވަގު ދަންނަވަން ދަތިކަމަށް އާދަމް ވިދާޅުވި އެވެ. ފައިސާގެ އިތުރުން އެހެން ބައެއް ތަކެތިވެސް އޮފީސް ތެރެއިން މަދުކަމަށް އޭނާ ވިދާޅުވި އެވެ.

ފެނަކަ ކޯޕަރޭޝަނުގެ ރީޖަނަލް އޮފީސް ވެސް ހުންނަ މި އިމާރާތައް ރޭގެ ވަގުތެއްގައި ވަގުވަދެ އިމާރާތުގެ ބައެއް ތަކެއްޗަށް ވެސް ވަނީ ގެއްލުން ދީފައެވެ.

ކުޅުދުއްފުށީ އިންޖީނުގެ އޮފީހާއި ފެނަކަ ކޯޕަރޭޝަނުގެ ރީޖަނަލް އޮފީސް ހުންނަ މި އިމާރާތުގައި ވޮޗަރުންނެ ނުތިބެއެވެ.

މިމައްސަލަ މިހާރު ދަނީ ކުޅުދުއްފުށީ ޕޮލިސް ސްޓޭޝަނުން ތަހްގީގު ކުރަމުންނެވެ. އަދި މިމައްސަލާގައި ތުހުމަތު ކުރެވޭ ގެތައް ވެސް ފުލުހުން ބަލާ ފާސް ކުރަމުންދާ ކަމަށް މައުލޫމާތު ލިބެއެވެ.