ވޯޓު ކަރުދާސް ޕްރިންޓްކުރި މައްސަލައިގައި ހިމެނޭ ދެ މީހުންގެ މައްޗަށް ދައުވާކުރުމަށް ޕީޖީއަށް ފޮނުވައިފި

ކުޅުދުއްފުށީ ރިޔާސީ އިންތިހާބުގެ ވޯޓު ކަރުދާސް ޕްރިންޓްކުރިކަމުގެ ތުހުމަތުގައި ހައްޔަރުކުރި ދެ މީހުންގެ މައްޗަށް ދައުވާކުރުމަށް އިލެކްޝަން ކޮމިޝަނުން ޕްރޮސިކިއުޓަރ ޖެނެރަލްގެ އޮފީހަށް ފޮނުވައިފި އެވެ.

ވޯޓު ކަރުދާސް ޕްރިންޓްކުރި ކަމުގެ ތުހުމަތުގައި ހައްޔަރުކުރި ކުޅުދުއްފުށީ މާވިނަ އަހުމަދު އާތިފް އާއި ބެނިސަން، އަހުމަދުގެ މައްޗަށް ދައުވާކުރުމަށް އެދި ޕީޖީއަށް ފޮނުވާފައިވަނީ މިއަދު އެވެ.

މައުލޫމާތު ލިބިފައިވާގޮތުގައި މި ދެ މީހުން މިއަދުގެ ވަގުތެއްގައި ވަނީ ފުލުހުންގެ ބަންދުން މިނިވަން ކޮށްފައެވެ.

ވޯޓު ކަރުދާސް ޕްރިންޓްކުރި މައްސަލައާ ގުޅިގެން ހައްޔަރުކުރި އާތިފަކީ އެމްޑީޕީގެ ކުޅުދުއްފުށީ ކެމްޕެއިން މެނޭޖަރެވެ. މި މައްސަލައާ ގުޅިގެން ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެމްބަރު ވިދާޅުވެފައިވަނީ އެޕާޓީން “ވޯޓު ކަރުދާސް” ޕްރިންޓްކުރީ އާންމުން ހޭލުންތެރިކުރުވުމަށް ކަމަށެވެ.