ފޭދޫގައި ކުޑަ ފިރިހެން ކުއްޖަކާ އެއްޖިންސުން ގުޅުން ހިންގިކަމުގެ ތުހުމަތުގައި މީހަކު ހައްޔަރު ކޮށްފި

ށ. ފޭދޫގައި 18 އަހަރު ނުވާ ކުޑަ ފިރިހެން ކުއްޖަކާ އެއްޖިންސުގެ ގުޅުން ހިނގި ކަމުގެ ތުހުމަތުގައި އެރަށުން މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ.

ފޭދޫ ކައުންސިލް މެމްބަރަކު މިނޫހަށް މަޢުލޫމާތު ދެމުން ބުނީ ކުޑަ ފިރިހެން ކުއްޖަކާ އެއްޖިންސުގެ ގުޅުން ހިންގިކަމުގެ ތުހުމަތުގައި އެރަށު އިންޖީނުގޭގައި ޑިއުޓީ އޮފިސަރަކަށް މަސައްކަތް ކުރާ އުމުރުން ގާތްގަނޑަކަށް 50 ހަކަށް އަހަރުގެ މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

އޭނާ ބުނީ އެމީހަކީ މިދިޔަ އަހަރުވެސް ކުޑަ އަންހެން ކުއްޖަކާއެކު ގަދަކަމުން ބަދުއަހުލާގީ އަމަލު ހިންގި ކަމުގެ ތުހުމަތުގައި ފުލުހުންގެ ބެލުމުގެ ދަށަށް ގެންގޮސްފައިވާ މީހެއްކަމަށާއި އޭގެ އިތުރުން ވެސް ތަފާތު މައްސަލަތަކުގައި އެމީހާއަކީ ފުލުހުން ބެލުމުގެ ދަށަށް ގެންގޮސްފައިވާ މީހެއް ކަމަށް ކައުންސިލް މެމްބަރު ވިދާޅުވި އެވެ.

މިނޫހަށް މައުލޫމާތު ލިބިފައިވާ ގޮތުގައި ފުލުހުންގެ ބެލުމުގެ ދަށަށް ގެންގޮސްފައިވާ މީހަކީ މީހަކާ އިނދެގެން އުޅޭ މީހެކެވެ. އަދި މީނާއަށް ކާފަ ކިޔާ ދަރިން ވެސް ތިބެއެވެ.

އެރަށުން ވާހަކަ ދެއްކި މީހަކު ބުނީ މިކަމެއް ހިނގުމުން އެސަރަހައްދަށް ވަރަށް ގިނަ މީހުން އެއްވެފައިވާ ކަމަށާއި އެ ކުޑަ ފިރިހެން ކުއްޖާ އެ އެންމެންގެ ހާޒިރުގައި އެކަން ކުރިކަމަށް ބުނެފައިވާ ކަމަށެވެ.

ފުލުހުން ބުނީ ކުޑަ ފިރިހެން ކުއްޖަކާ އެއްޖިންސުން ގުޅުން ހިނގި މައްސަލަ އެއްގާ އެރަށުން އިއްޔެ މީހަކު ހައްޔަރު ކޮށްފައިވާ ކަމަށާއި މައްސަލަ ތަހްގީގު ކުރިއަށް ދާތީ އިތުރު މައުލޫމާތު ދެއްވެން ނެތް ކަމަށެވެ.

ނޯޓް: މި ހަބަރު ކުރިން ޝާއިއު ކުރުމުގައި ހައްޔަރު ކުރި ފަރާތުގެ ނަމުގައި ކުށެއް ވަނީ ޖެހިފައެވެ. އެއީ ލިބުނު މައުލޫމާތުގެ ކުށެއްގެ ސަބަބުންނެވެ. މިކަމަށްޓަކައި ކިޔުންތެރިންގެ އަރިހުން ނިހާޔަތަށް މައާފަށް އެދެމެވެ.