ކުޅުދުއްފުށީގައި ޕީޕީއެމްގެ މެމްބަރުންނާއި އެމްޑީޕީގެ މެމްބަރުންގެ މެދުގައި ހަމަނުޖެހުމެއް ހިނގައިފި

ކުޅުދުއްފުށީގައި ޕީޕީއެމް މެމްބަރުންނާއި އެމްޑީޕީގެ މެމްބަރުންނާ ދެމެދު މިރޭ ހަމަނުޖެހުންތަކެއް ހިނގައިފި އެވެ.

މަންޒަރު ދުށް މީހަކު މިނޫހަށް މައުލޫމާތު ދެމުން ބުނީ ޕީޕީއެމްގެ އުތުރުގެ ކެމްޕެއިން ކޯޑިނޭޓަރ ނާއިފު ޝައުކަތު އިތުރު މީހަކާއެކު މަގުމަތިން ހިނގާފައި ދަނިކޮށް އެމްޑީޕީގެ ސައިކަލް ބުރުގައި ތިބި ބަޔަކުގެ ތެރެއިން މީހަކު އެ ޕާޓީގެ ދިދަ ދަނޑިއަކުން ނާއިފުގެ ގައިގައި ޖެހި މަންޒަރު ފެނުނު ކަމަށާއި އެހެންނަމަވެސް ޖަހާފައިވަނީ އެހާ ބާރަށް ނޫން ކަމަށެވެ. އަދި އެ ވަގުތު ސައިކަލްތަކުގައި ދިޔަ މީހުން މަޑުކޮށް ދެ ފަރާތުގެ ދެމުގައި ބަހުގެ ހޫނުހަމަލާތަކެއް ކުރިއަށް ދިޔަ ކަމަށެވެ.

އެމްޑީޕީ މެމްބަރަކު މި ނޫހަށް މައުލޫމާތު ދެމުން ބުނެފައިވަނީ، އެ ޕާޓީން މިރޭ ބޭއްވި ސައިކަލު ބުރެއް ކުރިއަށްދަނިކޮށް ކުޅުދުއްފުށީ އިންޖީނުގެ އޮފީސް ކައިރިން ޕީޕީއެމްގެ އުތުރުގެ ކޯޑިނޭޓަރ ނާއިފް ޝައުކަތު އެމްޑީޕީގެ މެމްބަރުންނާ ދިމާއަށް ހަޑިހުތުރު އެއްޗެހި ގޮވާފައިވާ ކަމަށާއި އަދި އެވަގުރު ސައިކަލުތައް އަނބުރާލާފައި ނާއިފް ކައިރިއަށް މަޑުކުރުމަށްފަހު ދެ ފަރާތުގެ ދެމެދުގައި ހޫނު ޒުވާބެއް ދިޔަކަމަށެވެ. އެހެންނަމަވެސް ގަޔަށް އަތްލައި މާރާމާރީ ހިންގާފައި ނުވާނެ ކަމަށް އޭނާ ބުންޏެވެ.

މިކަމުގެ މައުލޫމާތު ސާފުކޮށްލުމަށް ނާއިފް ޝައުކަތަށް ގުޅާލުމުން އޭނާގެ ފޯނަށް ޖަވާބު ނުދެއްވާތީ ނާއިފްގެ ބަހެއް ވަނީ ލިބޭ ގޮތް ނުވެފައެވެ.

މިރޭ ގާނގަޑަކަށް 10:45 ހާއިރު ހިނގި މިހާދިސާގައި ނާއިފް ގައިގައި ޖެހިކަމަށް ބުނޭ ޕީޕީއެމް މެމްބަރުން އެމްޑީޕީގެ ޖަގަހަ ކައިރިއަށް ދިޔުމުން ދެފަރާތުގެ މެދުގައި ބަހުގެ ހޫނު ހަމަލާތަކެއް ބަދަލުކޮށްފައި ވެއެވެ. އެހެންނަމަވެސް މާ ބޮޑު ހަމަނުޖެހުމެއް ނުހިގައެވެ.

އެމްޑީޕީގެ ޖަގަހަ ކައިރީ ހަމަނުޖެހުން ހިނގަން ފެށުމާއެކު މާ ގިނައިރުތަކެއް ނުވެ ފުލުހުން އެސަރަހައްދަށް އައިސް ވަނީ އެއްވެފަ ތިބި މީހުން ވަނީ ދުރުކޮށްފައެވެ.