އަމީނީމަގުގައި ތާރު އަޅާނިންމައި ބަންޑާރަމަގުގައި ތާރުއަޅަން ފަށަނީ

ކުޅުދުއްފުށީ އަމީނީމަގުގައި ތާރުއަޅާނިންމައި ބަންޑާރަ މަގުގައި ތާރު އެޅުމުގެ ތައްޔާރީތައް ވާންފަށައިފި އެވެ.

މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ) ގެ މެނޭޖިން ޑިރެކްޓަރ އިބްރާހިމް ނަޒީމް ވިދާޅުވީ އަމީނީމަގުގައި ތާރުއަޅާ އިއްޔެ ނިމިފައިވާ ކަމަށާއި މިހާރު ކުރިއަށް ދަނީ މަގު ރީތި ކުރުމުގެ މަސައްކަތާއި  ޕާކިން އޭރިއާ ތަކުގައި ގާ އެތުރުމުގެ މަސައްކަތް ކަމަށެވެ.

ނަޒީމް ވިދާޅުވީ މިންގަނޑަށް ނުފެތޭ ވަރުގެ ތަނެއް އަމީނީމަގުގައި ނުހުންނާނެ ކަމަށާއި އެފަދަ ތަނެއް ފާހަގަ ކުރެވިއްޖެނަމަ އެބޭފުޅުންގެ ޓީމުން އެކަންތައް ރަނގަޅު ކުރައްވާނެކަމަށެވެ.

ނަޒީމް އިތުރަށް ވިދާޅުވި ގޮތުގައި ދެން އެންމެ އަވަހަށް ތާރު އަޅަން ހަމަޖެހިފައިވަނީ ބަންޑާރަ މަގުގަ އެވެ. އެގޮތުން އަންނަ ހަފްތާގެ ތެރޭގައި އެމަގުގައި ދުވާރު އެޅުމުގެ މަސައްކަތް ފަށައި ހޮޅިތައް ވަޅުލުމުގެ މަސައްކަތް ކުރިއަށް ދާނެ ކަމަށް އޭނާ ވިދާޅުވި އެވެ. މިމަސައްކަތް ތަކުގެ ކުރިން މި މަގުގެ އަމަލީ މަސައްކަތް ފައްޓަވައިދެއްވުމަށް ރައީސުލް ޖުމްހޫރިއްޔާ ޑރ މުހައްމަދު ވަހީދު ހަސަން މާދަމާ ކުޅުދުއްފުއްޓަށް ވަޑައިގަތުމަށް ވަނީ ހަމަޖެހިފައެވެ.

އަމީނީ މަގުގައި ތާރު އެޅުން ކުރިއަށް ދިޔައިރު ކުޅުދުއްފުށީ ރައްޔިތުންގެ ފަރާތުން ލިބުނު އެއްބާރުލުން ފާހަގަ ކުރައްވައި އެންމެހާ ރައްޔިތުންނަށް ވަރަށް ބޮޑަށް ޝުކުރު އަދާ ކުރައްވައި ކަމުގައި އެމްއާރުޑީސީން ހާމަކުރެ އެވެ.

އޯގަސްޓް މަހުގެ 27 ވަނަ ދުވަހު އަމީނީ މަގުގައި ތާރު އަޅަން ފަށައި އިއްޔެ ނިންމާލިއިރު އެމަގުގެ 1.7 ކިލޯމީޓަރު ސަރަހައްދުގައި ވަނީ ތާރު އަޅާފައެވެ.