ހދ އޭއީސީގައި އިމާރާތްކުރާ ހޯލުގެ އަމަލީ މަސައްކަތް ކުރިއަށް އޮތް 2 ހަފްތާގެ ތެރޭގައި ފެށޭނެ: ސްވިފްޓް އިންޖިނިއަރިން

ހދ އަތޮޅު ތައުލީމީ މަރުކަޒުގެ ހޯލުގެ އައު އިމާރާތުގެ އަމަލީ މަސައްކަތް ކުރިއަށް އޮތް 2 ހަފްތާ ދުވަސް ތެރޭގައި ފެށޭނެ ކަމަށް އެ މަސައްކަތް ކުރުމަށް އެންމެ ފަހުން ހަވާލު ކުރި ސްވިފްޓް އިންޖިނިއަރިން ޕްރައިވެޓް ލިމިޓެޑުން ހާމަކޮށްފި އެވެ.

ސްވިފްޓް އިންޖިނިއަރިންގެ މެނޭޖިން ޑިރެކްޓަރ ސައުދުﷲ ހިލްމީ ވިދާޅުވީ ސައިޓް ހަވާލުކުރެވުނީ މިއަދު ކަމަށާއި ކުރިއަށް އޮތް 14 ދުވަހުގެ ތެރޭގައި ހޯލުގެ އިމާރާތުގެ އަމަލީ މަސައްކަތް ފެށޭނެ ކަމަށެވެ. އަދި ކުޑަ ދުވަސް ކޮޅެއްގެ ތެރޭގައި މެޝިނަރީ އާއި އިމާރާތް ކުރުމަށް ބޭނުންވާ ތަކެތި ކުޅުދުއްފުއްޓަށް ގެންދާނެެ ކަމަށްވެސް ސައުދުﷲ ވިދާޅުވި އެވެ.

“އަޅުގަނޑުމެންނަށް ސައިޓް ހަވާލު މިކުރެވުނީ މިއަދު. ސައިޓް ހަވާލު ކުރާތާ 14 ދުވަސް ތެރޭގައި މަސައްކަތް ފަށަން ޖެހޭ. އެހެންވިމާ ކުރިއަށް އޮތް ކުޑަ ދުވަސް ކޮޅެއްގެ ތެރޭގައި މަސައްކަތައް ފެށޭނެ. މިހާރު ކުރިއަށް ދަނީ ސައިޓަށް ގެންދަން ޖެހޭ މެޝިނަރީ ތައް ގެންދިއުމުގެ މަސައްކަތްތައް. މިހާރުވެސް ހިލަ އާއި ހިލަވެލި ސައިޓަށް ގެންދެވިފައިވާނީ” ސައުދުﷲ ވިދާޅުވި އެވެ.

ބިންގާ އެޅިތާ 2 އަހަރަށް ވުރެ ގިނަ ދުވަސް ވެފައިވާ މިހޯލުގެ މަސައްކަތް ވަނީ ކުރިން ވެސް ދެ ކުންފުންޏަކާ ހަވާލު ކުރެވިފައެވެ. އެހެންނަމަވެސް ދިމާވި އެކި މައްސަލަތަކާހެދި ހޯލު އިމާރާތްކުރުމުގެ އަމަލީ އެއްވެސް މަސައްކަތެއް ކުރެވިފައެއް ނުވެއެވެ.

ޖުމްލަ 6.6 މިލިއަން ރުފިޔާ ހަރަދުވާ މި އިމާރާތުގެ މަސައްކަތް ނިންމުމަށް ސްވިފްޓް އިންޖިނިއަރިންއާއެކު ސަރުކާރުން ސޮއިކޮށްފައިވަނީ މި މަހުގެ އެއްވަނަ ދުވަހެވެ. މި އިމާރާތުގެ މަސައްކަތް ނިންމުމަށް ދީފައިވަނީ 350 ދުވަހެވެ.