އިލެކްޝަންގެ އޮފިޝަލުންނަށް މަރުގެ އިންޒާރުގެ މެސެޖްތަކެއް ފޮނުވައިފި

ރިޔާސީ އިންތިހާބުގައި އިލެކްޝަނުން އޮފިޝަލުންގެ ގޮތުގައި ވޯޓްފޮށިތައް ކަރީގައި ހަރަކާތްތެރިވި އޮފިޝަލުން އެމަގާމު ތަކުން އިސްތިއުފާ ނުދީފީ ނަމަ އެ އޮފިޝަލުންނާއި އެމީހުންގެ އާއިލާ މަރާލާނެކަމުގެ އިންޒާރު ދީ އެސްއެމްއެސް ފޮނުވައިފި އެވެ.

ރޭގައި ދައުރުވި މި އެސްއެމްއެސް ގައި ވަނީ “ފޮށިތައް ކައިރީގައި ތިބެގެން ވޯޓު އޮޅުވަން ކުރި ކަންތައް ތައް ފަޅާއަރަނީ. ކަލޭ އިސްތިއުފާ ދީ. ނޫން ނަމަ އާއިލާ ވެސް މަރާލާނަން. ﷲ އަކުބަރު ދީނުގެ ހައްގުގައި މިތިބީ” މިހެންނެވެ.

ރޭ ގައި މިއެސްއެމްއެސް ފޮނުވާއިރު މީގެ ދެރެއަކު ކުރިން ވެސް ވަނީ ރިޔާސީ އިންތިހާބުގައި އިލެކްޝަން ކޮމިޝަނުގެ އޮފިޝަލުންގެ ގޮތުގައި ވޯޓް ފޮށި ކައިރީ ހަރަކާތްތެރިވި ފަރާތްތަކަށް މަރުގެ އިންޒާރު ދީ ވެސް އެސްއެމްއެސް ކޮށްފައެވެ.

މަރުގެ އިންޒާރުދީ ހުކުރު ދުވަހުގެ ރޭ ފޮނުވި އެސްއެމްއެސްގައި ވާ ގޮތުން ރިޔާސީ އިންތިހާބުގެ ދެވަނަ ބުރު ކުރިއަށް ގެންގޮސްފި ނަމަ މަރާލާނޭ ކަމަށް ބުނެ އިންޒާރު ދީފައިވެއެވެ.

އެ އެސްއެމްއެސްގައި ވަނީ “ސުޕުރީމް ކޯޓްގެ އަމުރާއި ހިލާފަށް ދިވެހި ޤައުމުގެ ޤާނޫނު އަސާސީއާ ހިލާފަށް ފުއާދު ތަޢުފީގުއާއި ބައިއަތު ހިފައިގެން ވޯޓް ކަންތައްތައް ހިންގައިފިއްޔާ މަރާނަން. ﷲ އަކުބަރު!” މި ހެންނެވެ.

މައުލޫމާތު ލިބިފައިވާ ގޮތުގައި އިލެކްޝަން ކޮމިޝަނުން މިހާރު މި މައްސަލަ ތަހުގީގު ކޮށްދިނުމަށް ފުލުހުންގެ ކިބައިން ވަނީ އެދިފައެވެ. އެކަމާބެހޭ ގޮތުން ފުލުހުން އަދި މީޑިޔާއަކަށް މައުލޫމާތު ދީފައެއް ނުވެއެވެ.

މި އެސްއެމްއެސް ތައް ފޮނުވާފައިވައި ވަނީ އެކި ނަމްބަރު ތަކުގައެވެ. އެގޮތުން އެ އިންޒާރުދީ އެސްއެމްއެސް ފޮނުވި ބައެއް ނަންބަރު ތަކަކީ 9762125، 9762104، 9762116 އަދި 9762111 އެވެ.

މައުލޫމާތު ލިބިފައިވާ ގޮތުގައި މި އެސްއެމްއެސް ފޮނުވި މީހާ މިހާރު ވަނީ ހައްޔަރުކޮށްފައެވެ. އެހެންނަމަވެސް ފުލުހުންގެ ފަރާތުން އެކަން ކަށަވަރު ކުރެވޭގޮތްވަނީ ނުވެފައެވެ.