ވޯޓު ކަރުދާސް ޕްރިންޓްކުރި މައްސަލައިގައި ހިމެނޭ ދެ މީހުންގެ މައްސަލަ ހައިކޯޓަށް ފޮނުވައިފި

ކުޅުދުއްފުށީގައި ވޯޓު ކަރުދާސް ޕްރިންޓްކުރި މައްސަލައިގައި ހިމެނޭ ދެ މީހުންގެ މައްސަލަ ޕްރޮސިކިއުޓަރ ޖެނެރަލްގެ އޮފީހުން ހައިކޯޓަށް ފޮނުވައިފި އެވެ.

މި ދެ މީހުންގެ މައްސަލަ ހައިކޯޓަށް ހުށަހަޅާފައިވަނީ އިންތިހާބުތަކާބެހޭ އާންމު ޤާނޫނުގެ ދަށުން، އިންތިހާބާބެހޭ ކުށުގެ މައްސަލަތައް ހުށަހަޅާ ފުރަތަމަ ކޯޓަކީ ހައިކޯޓު ކަމަށް ބުނެފައިވާތީ އެވެ.

އިންތިހާބާބެހޭ އާންމު ގާނޫނުގެ 74 ވަނަ މާއްދާގައި ބުނެފައިވާ ގޮތުގައި އިލެކްޝަންސް ކޮމިޝަނުގެ ހުއްދަނެތި ވޯޓު ކަރުދާސް ނުވަތަ ވޯޓު ކަރުދާހުގެ ގޮތުގައި އިންތިހާބުގައި ބޭނުންކުރެވިދާނެ ފަދަ އެއްޗެއް އުފެއްދުމަކީ ކުށެކެވެ. އަދި ހަމަ އެ މާއްދާގެ ހ ގެ 10 ގައި ބުނެފައިވަނީ އިންތިހާބުގައި ވޯޓު ކަރުދާސް ހުންނާނެ ގޮތާމެދު އިލެކްޝަންސް ކޮމިޝަން ފިޔަވައި އެއްވެސް ފަރާތަކުން އިއުލާނެއް ނުވަތަ އެއްވެސް ބާވަތެއްގެ އިޝްތިހާރެއް ކުރުމަކީ ކުށެއް ކަމަށެވެ.

އެ ދެ މީހުންގެ މައްޗަށް ވޯޓު ކަރުދާސް ޕްރިންޓްކުރި މައްސަލަ ސާބިތުވެއްޖެނަމަ 1 އަހަރާއި 4 އަހަރު ދުވަހާ ދެމެދުގެ މުއްދަތަކަށް ޖަލަށް ލުމަށް ނުވަތަ 12 ހާސް ރުފިޔާއާއި 48 ހާސް ރުފިޔާއާ ދެމެދުގެ އަދަދަކުން ޖޫރިމަނާ ކުރުމުގެ ހުކުމެއް އަންނާނެ އެވެ. އިންތިހާބާބެހޭ ގާނޫނު ބުނާގޮތުން އިންތިހާބާ ގުޅޭ މިފަދަ މައްސަލަތައް ހައިކޯޓުން ގިނަވެގެން 30 ދުވަހުގެ ތެރޭގައި ނިންމަންޖެހެއެވެ.

ވޯޓު ކަރުދާސް ޕްރިންޓް ކުރި މައްސަލައިގައި ކުޅުދުއްފުށިން ހައްޔަރުކޮށްފައިވަނީ، އެމްޑީޕީ ކުޅުދުއްފުށީ ކެމްޕެއިން މެނޭޖަރ އަހުމަދު އާތިފް އާއި ބެނިސަން، އަހުމަދު އަބްދުއްރަހީމެވެ.

މި މައްސަލައާ ގުޅިގެން ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ މެމްބަރު ވިދާޅުވެފައިވަނީ ވޯޓް ކަރުދާސް ޕްރިންޓްކޮށްފައިވަނީ އާންމުން ހޭލުންތެރި ކުރުވުމަށް ކަމަށެވެ. ވޯޓު ކަރުދާސް ޕްރިންޓް ކޮށްފައިވަނީ ކުޅުދުއްފުށީގައި ހުންނަ އެމްއޯސީ ބުކްޝޮޕުންނެވެ.

މި ދެ މީހުންގެ ބަންދުގެ މުއްދަތަށް 10 ދުވަސް ޖިނާއީ ކޯޓުން އިތުރު ކޮށްފައި ވެއެވެ. ތަހުގީގު ނިންމުމަށްފަހު އެ ދެ މީހުން ފުލުހުންގެ ބަންދުން ދޫ ކޮށްލާފައިވަނީ މި މަހުގެ 24 ވަނަ ދުވަހު އެވެ.