ބިންހެލުމާއެކު އަލަށް އުފެދުނު ރަށުގެ ފޮޓޯތައް ނާސާއިން އާއްމުކޮށްފި

ޕާކިސްތާނަށް އައި ބާރުގަދަ ބިންހެލުމާއެކު އުފެދުނު ރަށުގެ ފޮޓޯތައް ނާސާއިން އާއްމު ކޮށްފި އެވެ.

ހުސްވި ސެޕްޓެމްބަރު މަހުގެ 24 ވަނަ ދުވަހު ޕާކިސްތާނުގެ ބަލޫޗިސްތާނަށް ރިކްޓަރ މިންގަނޑުން 7.7 ގެ ބާރުމިނުގައި އައި މި ބިންހެލުމުގައި އުފެދުނު ރަށުގެ އުސްމިނުގައި 60-70 ފޫޓް ހުރިކަމަށާއި ފުޅާމިނުގައި 300 ފޫޓް އަދި ދިގު މިނުގައި 120 ފޫޓް އެބަހުރި ކަމަށް ރިޕޯޓުތައް ބުނެއެވެ. މިރަށް އުފެދިފައިވަނީ ބިންހެލުމުގެ އެޕީސެންޓަރުން ފެށިގެން 380 ކިލޯމީޓަރު ދުރުގައި ކަނޑުގައެވެ.

ނާސާއިން އާއްމުކޮށްފައިވާ ފުރަތަމަ ފޮޓޯއަކީ ބިންހެލުމަށްފަހު ސެޕްޓެމްބަރު މަހުގެ 26 ވަނަދުވަހު ނާސާގެ ސެޓަލައިޓަކުން ނަގާފައިވާ ފޮޓޯއެކެވެ. ދެވަނަ ފޮޓޯއަކީ ހަމަ އެތަން މިއަހަރުގެ އޭޕްރީލް މަހުގެ 17 ވަނަ ދުވަހު އޮތް ގޮތުގެ ފޮޓޯއެކެވެ. އޭރު އެތަނުގައި އެއްވެސް އެއްޗެއް ފެންނާކަށް ނެތެވެ.

ސައިންސްވެރިން ލަފާކުރާގޮތުގައި ބިންހެލުމާ އެކު ކަނޑުތެރޭގައި އުފެދުނު ރަށް ގިނަ ދުވަސްތަކަކަށް ދެމި އޮވެދާނެ ކަމަށް ނުބެލެވޭ ކަމަށެވެ. އަދި އެ ރަށުން ބިމުން މީތޭން ގޭސް ބޭރުވަމުން ދާތީ، އަލިފާން ގެންގުޅެފި ނަމަ ރޯވާ ކަމަށެވެ.

ޕާކިސްތާނުގެ ނެޝަނަލް އިންސްޓްޓިއުޓް އޮފް އޯޝަނަގްރަފީގެ ބަޔޮލޮޖިސްޓެއް ވިދާޅުވީ އެ އިދާރާގެ ތަޖުރިބާކާރުން ރަށަށް ޒިޔާރަތްކޮށްފައިވާ ކަމަށާއި އެ ރަށުގެ ބިމުން މީތޭން ގޭސް ބޭރުވަމުންދާކަން އެނގިފައިވާ ކަމަށެވެ.

500 މީހުން މަރުވި މި ބިންހެލުމުގައި 3 ލައްކަ މީހުންނަށް ވަނީ އަސަރުކޮށްފައެވެ. އަދި 21،000 މީހުންގެ ގެދޮރު ވަނީ ހަލާކުވެފައެވެ.

[yass cats=41]