ދިރާގުގެ ރިހި ޔޫބީލް ފާހަގަ ކުރުމުގެ ގޮތުން ކުޅުދުއްފުށީގައި ހާއްސަ ހަރަކާތްތަކެއް ކުރިއަށް ގެންގޮސްފި

މިއަދު ފާހަގަ ކުރަމުންދާ ދިރާގުގެ ރިހިޔޫބީލްގެ މުނާސަބާތުގައި ދިރާގު ކުޅުދުއްފުށީގެ ފަރާތުން ހާއްސަ ހަރަކާތްތަކެއް ހިންގައިފި އެވެ.

އެގޮތުން މިއަދު ހަވީރު ދިރާގު ކުޅުދުއްފުށީ ބުރާންޗުގެ މުވައްޒަފުންނާއި ކުޅުދުއްފުށީ ރީޖަނަލް ހޮސްޕިޓަލުގެ މުވައްޒަފުންނާ ދެމެދު ހާއްސަ ފުޓުބޯޅަ ދެ މެޗް ކުޅެފައި ވެއެވެ.

ފުރަތަމަ މެޗުގައި ދިރާގު އަދި ހޮސްޕިޓަލުގެ ފިރިހެން މުވައްޒަފުން ބައްދަލު ކުރިއިރު މި މެޗް 5-0 ލަނޑުން ކާމިޔާބު ކުރީ ހޮސްޕިޓަލުގެ ޓީމެވެ.

ދެވަނަ މެޗުގައި ދިރާގު އަދި ހޮސްޕިޓަލުގެ އަންހެން ސްޓާފުންގެ މެދުގައި ކުޅެވުނު ފުޓުސަލް މެޗެކެވެ. މި ފުޓްސަލް މެޗްވެސް 1-0 ލަނޑުން ކާމިޔާބު ކުރީ ހޮސްޕިޓަލުގެ ޓީމުންނެވެ.

މެޗަށް ފަހު މިއަދުގެ މެޗުތަކުގައި ބައިވެރިވި ހޮސްޕިޓަލުގެ ދެ ޓީމަށް ވަނީ ހަނދާނީ ފިލާ ހަވާލުކޮށްފައެވެ. އެ ޓީމުތަކާ މި ފިލާ ހަވާލުކޮށްދެއްވީ މި ހަވީރުގެ ޝަރަފުވެރި މެހެމާން ކުޅުދުއްފުށީ ދިރާގުގައި ވަރަށް ދިގު މުއްދަތެއްގައި މަސައްކަތްކުރެއްވި މުޙައްމަދު އުމަރެވެ.

މިއަދުގެ މެޗްތައް ބަލާލަން ދިޔަ ސަޕޯޓަރުންގެ މެދުގައި ހާއްސަ ލަކީ ޑުރޯއެއް ވެސް ބާއްވައިފައި ވެއެވެ. މި ލަކީޑުރޯއިން ގުރުއަތުން ހޮވުނު ތިން ފަރާތަކަށް ގިފްޓް ހެމްޕާރސް ވަނީ ހަދިޔާ ކޮށްފައެވެ. އަދި ގުރުއަތުން ހޮވުނު އެއް ފަރާތަކާއި ވަނީ ދިރާގު ޓަޗްނެޓް މޮޑެމްއެއް ވެސް ހަވާލު ކޮށްފައެވެ.

ދިރާގުގެ އަހަރީ ދުވަސް ފާހަގަ ކުރުމުގެ ގޮތުން މިއަދު ހެނދުނު ވަނީ ދިރާގުގެ ސްޓާފުންގެ ބައިސްކަލު ބުރެއްވެސް ބާއްވާފަ އެވެ. އަދި މިއަދު ދިރާގު ކުޅުދުއްފުށީ އޮޕަރޭޝަން ސެންޓަރުން ހިދުމަތް ހޯދި ކޮންމެ ކަސްޓަމަރަކަށްވެސް ހަދިޔާއެއް ހަވާލު ކުރެވުނު ކަމަށް އެ ސެންޓަރުން މައުލޫމާތު ދެއްވައެވެ.