ވިޔަފާރީގެ ދާއިރާގެ ޑިގްރީ ކޯހެއް ނުހިންގެނީ އެކަށީގެންވާ ލެކްޗަރާއިން އިން ނުލިބޭތީ: ކުޅުދުއްފުށީ ކެމްޕަސް

ގައުމީ ޔުނިވަރސިޓީގެ ފެކަލްޓީ އޮފް މެނޭޖްމަންޓް އެންޑް ކޮމްޕިއުޓިންގ (އެފްއެމްސީ) އިން ހިންގާ ވިޔަފާރީގެ ދާއިރާގެ ބެޗްލަރ ޑިގްރީ ފެންވަރުގެ ކޯސްތައް ނުހިންގަނީ އެކަމަށް ބޭނުންވާ ލެކްޗަރާއިން ނުލިބޭތީ ކަމަށް ކުޅުދުއްފުށީ ކެމްޕަހުގެ މެނޭޖަރ އިބްރާހީމް ފައިސަލް ވިދާޅުވި އެވެ.

ބެޗްލަރ އިން ބިޒްނަސް ކޯސް ކުޅުދުއްފުށީގައި ނުފަށާތީ ކެމްޕަހަށް ވަންނަން ބޭނުންވާ ގިނަ ދަރިވަރުން ސުވާލުކުރަމުން އަންނައިރު އެ ދާއިރާގެ ޑިގްރީ ކޯހެއް މިހާރު ކުރިއަށް ގެންދެވިދާނެ ކަމަށް ގަބޫލު ނުކުރައްވާ ކަމަށް ފައިސަލް ވިދާޅުވި އެވެ.

ފައިސަލް ވިދާޅުވީ ޑިޕްލޮމާ އިން ބިޒްނަސް ކޯސް ރަނގަޅަށް ކުޅުދުއްފުށީގައި ކުރިއަށް ނުގެންދެވޭއިރު ޑިގްރީ ކޯހެއް ކުރިއަށް ނުގެންދެވޭނެ ކަމަށެވެ. މާލޭގައާއި އައްޑޫގައި އެ ކޯސް ހިންގެނީ ކަމަށް އެކަށީގެންވާ ގާބިލު ލެކްޗަރަރއިން ތިބެގެން ކަމަށާއި ކުޅުދުއްފުށީގައި އެފަދަ ބަޔަކު ނެތްއިރު އިއުލާނުކޮށްގެންވެސް ލެކްޗަރަރއިން ނުލިބޭ ކަމަށް ފައިސަލް ވިދާޅުވި އެވެ.

އަންނަ އަހަރުގެ ފުރަތަމަ ސެމިސްޓަރގައި ކުޅުދުއްފުށީ ކެމްޕަހުގައި 38 ކޯހެއް ފެށުމަށް އިއުލާން ކޮށްފައިވާއިރު އެހެން އަހަރު ތަކެކޭ އެއްގޮތަށް ފެށޭވަރުވާނީ ގާތްގަނޑަކަށް 15 ވަރަކަށް ކޯސް ކަމަށްވެސް ފައިސަލު ވިދާޅުވި އެވެ.

އަންނަ އަހަރު ފަށާ ކޯސްތަކުގެ ތެރޭގައި ދިވެހި ބަހުގެ ޑިގްރީ ކޯހަކާއި އިސްލާމިކް ސްޓަޑީޒްގެ ޑިގްރީ ކޯހެއް ކުޅުދުއްފުށީ ކެމްޕަހުގައި އަލަށް ފަށާނެ އެވެ. މީގެ އިތުރުން ޓުއަރިޒަމް ދާއިރާގެ ގިނަ ކޯސްތަކެއްވެސް މިހާރު ކުޅުދުއްފުށީ ކެމްޕަހުގައި ކުރިއަށް ގެންދަން ވަނީ ނިންމާފައެވެ.