ކުޅުދުއްފުށީގެ ސްކޫލުތަކުގައި މުދައްރިސުންގެ ދުވަސް ވަރަށް ކުލަގަދަކޮށް ފާހަގަ ކޮށްފި

ކުޅުދުއްފުށީގެ ސްކޫލުތަކުގައި ބައިނަލްއަޤްވާމީ މުދައްރިސުންގެ ދުވަސް ވަރަށް ކުލަގަދަކޮށް ފާހަގަ ކޮށްފި އެވެ.

މި ދުވަސް ފާހަގަކުރުމުގެ ގޮތުން ގިނަ ސްކޫލުތަކެއްގައި މިއަދު ހެނދުނު ވަނީ ޚާއްސަ އެސެމްބްލީ ބާއްވާފަ އެވެ. އެގޮތުން އިރުމަތި އަވަށު ޕްރީ ސްކޫލް (އައިޕީއެސް) އާއި އަފީފުއްދީން ސްކޫލުގައި ވަނީ ޚާއްސަ އެސެމްބްލީ އެއް ބާއްވާފަ އެވެ.

އައިޕީއެސް ގެ ކޮންމެ އާންޓީއަކަށް މިއަދު ވަނީ ބެލެނިވެރިންގެ ފަރާތުން މަރުހަބާގެ މާ ފައްޗަކާއި ކުރުނބަލެއް ހަދިޔާކޮށްފައެވެ. އަދި މިއަދު ބޭއްވުނު އެސެމްބްލީގައި ޕީޓީއޭގެ ފަރާތުން ކޮންމެ އާންޓީއަކަށް ވަނީ ހަނދާނީ ފިލައެއްވެސް ހަދިޔާކޮށްފަ އެވެ. އައިޕީއެސްގައި މިއަދު ބޭއްވުނު އެސެމްބްލީ ޝަރަފްވެރި ކޮށްދެއްވާފައިވަނީ ކުޅުދުއްފުށި ޕްރައިމަރީ ސްކޫލުތަކުގައި ގިނަ ދުވަސްތަކެއް ވަންދެން ސުޕަވައިޒަރެއްގެ މަގާމް އަދާކުރެއްވި ފާތިމަތު އަބޫބަކުރެވެ. މިއަދު އައިޕީއެސްގައި ކިޔަވައިދީފައިވަނީ ބެލެނިވެރިންގެ ތެރެއިން ބައެއް ފަރާތްތަކުންނެވެ.

މިއަދު ހެނދުނު އަފީފުއްދީން ސްކޫލުގައި ބޭއްވި ޚާއްސަ އެސެމްބްލީގައި ދަރިވަރުންވަނީ ދުވަހާ ގުޅޭގޮތުން ޝުއޫރު ފާޅުކޮށްފަ އެވެ. އަދި އަފީފުއްދީން ސްކޫލުގެ ޓީޗަރުންގެ އާއިލީ ހަވީރެއް ބޭއްވުމަށް ހަމަޖެހިފައިވާ ކަމަށް އެސްކޫލުން މައުލޫމާތު ދެއެވެ. މުދައްރިސުންގެ ދުވަސް ފާހަގަކުރުމުގެ ހަރަކާތްތައް ހދ އަތޮޅު ތައުލީމީ މަރުކަޒުން ފާހަގަކުރުމަށް ނިންމާފައިވަނީ މާދަމާއިން ފެށިގެންނެވެ. މިގޮތުން މާދަމާ ހަވީރު މަސްދަތުރެއް ދިޔުމަށް ހަަމަޖެހިފައިވާ ކަމަށާއި އާދީއްތަ ދުވަހު ހެނދުނު ސްކޫލުގެ ދަރިވަރުންނާއި ޓީޗަރުން ރަށުތެރޭގައި ހިނގާލުމަށް ހަމަޖެހިފައިވާ ކަމަށް އެސްކޫލުން ހާމަކުރެއެވެ.

ކުޅުދުއްފުށި ޖަލާލުއްދީން ސްކޫލުގައި މިދުވަސް ފާހަގަ ކުރުމަށް ހަމަޖެހިފައިވަނީ ފަހުގެ ތާރީޚެއްގައި ކަމަށް އެސްކޫލުން ހާމަކުރެއެވެ. ކުޅުދުއްފުށީގެ 5 ސްކޫލުގެ ސްކޫލު ބޯޑުން އިންތިޒާމުކޮށްގެން ޓީޗަރުންނަށް ބާއްވާ ޑިނާ ނައިޓެއް ހޮނިހިރު ދުވަހުގެ ރޭ އަފީފުއްދީން ސްކޫލް ހޯލުގައި ބޭއްވުމަށްވެސް ވަނީހަމަޖެހިފައެވެ.

ބައިނަލް އަޤްވާމީ މުދައްރިސުންގެ ދުވަހަކީ އޮކްޓޯބަރު މަހުގެ 5 ވަނަ ދުވަހެވެ. މިއަހަރު ފާހަގަ ކުރަމުން މިދަނީ 19 ވަނަ މުދައްރިސުންގެ ދުވަހެވެ.