ވޯޓު ކަރުދާސް ޕްރިންޓްކުރި މައްސަލައިގެ އަޑުއެހުންތައް ހައިކޯޓުގައި ނިންމާލައިފި

ރިޔާސީ އިންތިޚާބުގެ ފުރަތަމަ ބުރުގައި ވޯޓު ކަރުދާސް ޕްރިންޓްކުރި މައްސަލައިގެ އަޑުއެހުންތައް ހައިކޯޓުގައި ނިންމާލައިފި އެވެ.

ކުޅުދުއްފުށީގައި ވޯޓު ކަރުދާސް ޕްރިންޓްކުރި މައްސަލައިގެ ދައުވާ ލިބޭ އަހުމަދު އާތިފްގެ ޝަރީއަތުގެ ދެވަނަ އަޑުއެހުން މިއަދު ހައިކޯޓުގައި ބާއްވާފައިވާއިރު، އިތުރުކަމެއް ސާފުކުރަން ނުޖެހޭނަމަ ދެން އޮންނާނީ ހުކުމް އިއްވުންކަމަށް ހައިކޯޓުގައި މި މައްސަލަބައްލަވާ ފަނޑިޔާރުންގެ ބެންޗުން ވަނީ ބުނެފަ އެވެ.

ދުވަހު ނޫސް ހަވީރުގައި ރިޕޯޓުކޮށްފައިވާ ގޮތުގައި، މިއަދު ބޭއްވި ޝަރީއަތުގެ މަޖިލީހުގައި ދައުލަތުގެ ވަކީލު ވިދާޅުވެފައިވަނީ ވޯޓު ކަރުދާސް ހުންނާނެ ގޮތަށް ޕްރިންޓްކުރި މީހާގެ އަމިއްލަ އިއުތިރާފުން ވެސް އޭނާގެ މައްޗަށް އެ ކުށް ސާބިތުވާނެ ކަމަށް ދެކޭ ކަމަށެވެ. އަދި އާތިފްގެ މައްޗަށް ކުރަނީ އިޝްތިހާރުކުރަން އުޅުމުގެ ދައުވާ ކަމަށްވާތީ އެ ކަރުދާސް ޕްރިންޓްކުރި ކަމަށް އާތިފް އެއްބަސްވާއިރު އެ ތަކެތި އިޝްތިހާރުކުރިތޯ ނުވަތަ ނޫންތޯ ބަލަން ނުޖެހޭނެ ކަމަށް ދައުލަތުގެ ވަަކީލު ވިދާޅުވި އެވެ. އިޝްތިހާރު ކުރުމަކީ ހަމައެކަނި މީޑިއާގައި އެ އެއްޗެއް ޝާއިއުކުރުން ނޫން ކަމަށާއި މީޑިއާގައި ޝާއިއުކުރުމަކީ އޭގެ މިންވަރެއް ކަމަށްވާއިރު އިޝްތިހާރުކުރުމުގެ އެންމެ ބޮޑު މިންވަރާއި ކުޑަ މިންވަރު ވެސް ގާނޫނީ ގޮތުން މަނާވާނެ ކަމަށް ވެސް ދައުލަތުގެ ވަކީލު ވިދާޅުވި އެވެ.

ވޯޓު ކަރުދާސް ހުންނާނެ ގޮތަށް އިޝްތިހާރު ކުރަން އުޅުމުގެ ދައުވާ ދައުލަތުން އުފުލާފައިވާ ކުޅުދުއްފުށީ މާވިނަ، އަހުމަދު އާތިފާއި ބެނިސަން، އަހުމަދު އަބްދުއްރަހީމްގެ ތެރެއިން އަހުމަދު އަބްދުއްރަހީމްގެ ދައުވާ ދައުލަތުން މިއަދު ވަނީ އަނބުރާ ގެންގޮސްފައިވާ ކަމަށް ހަވީރު ނޫހުގައި ވެއެވެ.

ހަވީރު ނޫހުގައި ރިޕޯޓު ކޮށްފައިވާ ގޮތުގައި މި މައްސަލާގައި މިއަދުގެ އަޑުއެހުމުގައި އާތިފްގެ ވަކީލް އަބްދުﷲ ހަސީން ވިދާޅުވީ އެ ތަކެތި ޕްރިންޓްކުރީ އެހެން މީހަކު ބުނެގެން ކަމަށާއި އެ މީހަކު އެ އެއްޗެއް ބޭނުންވީ ހޭލުންތެރިކުރުމަށް ކަމަށެވެ. އަދި އެއްވެސް ބަޔަކު ހޭލުންތެރި ކުރުމުގައި އާތިފް ބައިވެރިވެފައިނުވާ ކަމަށާއި އެ ތަކެތީގެ ފޮޓޯ ފޭސްބުކަށް ލުމަށް ދެ މީހަކު ބުނުމުން ވެސް އެކަމަށް އާތިފް ދެކޮޅު ހަދާފައިވާކަން އެ މީހުންގެ ބަޔާންތަކުން އެނގޭ ކަމަށް އޭނާ ވިދާޅުވި އެވެ. އަދި އަސްލު ކަރުދާހާއި އާތިފް ގެންގުޅުނު ކަރުދާހުގައި ތަފާތު ހުރިކަން އޭނާ ފާހަގަކުރެއްވި އެވެ.

މިއަދުގެ ޝަރީއަތުގެ ފަނޑިޔާރުން ސީދާ އާތިފާ ބައެއް ސުވާލުތައް ކުރިމަތި ކޮށްފައި ވެއެވެ.