ޖަލާލުއްދީން ސްކޫލުގެ އެންމެ މޮޅު ދަރިވަރަކަށް ހަދީޖާ އަބްދުﷲ އާއި އަބްދުﷲ އިބްރާހިމް ހޮވައިފި

ޖަލާލުއްދީންގެ މިދިޔަ އަހަރުގެ އޯލެވެލް ހުރިހާ ގޮތަކުން އެންމެ މޮޅު ދަރިވަރަކަށް ހަދީޖާ އަބްދުﷲ އަދި އޭލެވެލް ހުރިހާ ގޮތަކުން އެންމެ މޮޅު ދަރިވަރަކަށް އަބްދުﷲ އިބްރާހިމް ހޮވައިފި އެވެ.

ރޭ ޖަލާލުއްދީން ސްކޫލުގައި ބޭއްވި އެ ސްކޫލުގެ އަހަރީ އިނާމު ދިނުމުގެ ޖަލްސާގައި މިދިޔަ އަހަރު އެ ސްކޫލުގެ އޯލެވެލްއާއި އޭލެވެލްގެ އެންމެ މޮޅު ދިހަ ދަރިވަރުން ހޮވާ އިނާމު ދީފައިވެއެވެ. އަދި ސާނަވީ އާއި މަތީ ސާނަވީގެ ޤައުމީ ގަދަ ދިހައެއްގައި ހޮވުނު ދަރިވަރުންނަށްވެސް ތައްޓާއި ޓްރޮފީ އަދި މެޑަލްވަނީ ދީފައެވެ. މީގެ އިތުރުންވެސް ވަކިވަކި މާއްދާތަކުންނާއި، ޤައުމީ އަދި ބައިނަލް އަޤްވާމީ ފެންވަރުގައި ބޭއްވުނު މުބާރާތްތަކުން ވަނަވަނައަށް ދިޔަ ދަރިވަރުންނަށް މި ޖަލްސާގައި ވަނީ އިނާމް ދީފައެވެ.

ޖަލާލުއްދީންގައި ރޭ ބޭއްވި އިނާމު ދިނުމުގެ ޖަލްސާ ޝަރަފުވެރި ކޮށްދެއްވީ އެޑިއުކޭޝަން މިނިސްޓްރީގެ ޕާމަނަންޓް ސެކެޓްރީ ޑރ. އަބްދުލް މުހުސިން މުހައްމަދެވެ. ޝަރަފްވެރި މެހެމާން ރަސްމިއްޔާތަށް ވަޑައިގެންނެވުމުން ޘަޤާފީ ހިނގާލުމުގެ ހަރަކާތްތަކާއެކު މަރުހަބާ ދަންނަވާފައި ވެއެވެ.

މިޖަލްސާގައި ޝަރަފްވެރި މެހެމާން ދެއްކެވި ވާހަކައިގައި ދިރިއުޅުމުގެ އަމަލީ މައިދާނުގައި މަސައްކަތްތެރި މީހަކަށް ވުމަށް ނަސޭހަތްތެރިވެލެއްވި އެވެ. އަދި ކޮންމެ މަސައްކަތަކީވެސް އެކަށީގެންވާ އާމްދަނީއެއް ލިބޭނެ މަސައްކަތެއް ކަމަށާއި އެކުއްޖެއްގެ ޝައުގުވެރިކަން ހުރި ދާއިރާއަކުން ކުރިއަށް ދިޔުމަށް އިރުޝާދު ދެއްވި އެވެ.

މިޖަލްސާގައި އެ ސްކޫލުގެ ގްރޭޑް 8 އަދި 9 ގެ ދަރިވަރުންނަށް އިނާމު ބައްސަވައިދެއްވީ ބޭންކު އޮފް މޯލްޑިވްސް ކުޅުދުއްފުށީ ބްރާންޗްގެ މެނޭޖަރ ޤާސިމް އަބްދުލް ކަރީމެވެ. މީގެ އިތުރުން ގްރޭޑް 10، 11 އަދި 12 ގެ ދަރިވަރުންނަށް އިނާމު ހަވާލު ކޮށްދެއްވީ މިނިސްޓްރީ އޮފް އެޑިއުކޭޝަންގެ ޑެޕިއުޓީ ޑިރެކްޓަރ ޖެނެރަލް  ފާތިމަތު މުނާއެވެ. އަދި ހާއްސަ ވަނަތަކަށް އިނާމް ބައްސަވައި ދެއްވީ ޝަރަފްވެރި މެހެމާން ޑރ އަބްދުލް މުހުސިން މުހައްމަދެވެ.

ކުޅުދުއްފުށީގައި ހުރި ސްކޫލުތަކާއި ސަރުކާރުގެ އެކިއެކި މުއައްސަސާތަކުގެ އިސްވެރިން ބައިވެރިވި މިޖަލްސާގައި ވޭތުވެދިޔަ އަހަރު ސްކޫލު ހިނގާދިޔަގޮތުގެ ރިޕޯޓް އިއްވައިދެއްވީ ޑެޕިއުޓީ ޕްރިންސިޕަލް އަލީ އިސްމާއީލެވެ.

ރޭގެ ޖަލްސާގައި އެ ސްކޫލުގެ 85 ދަރިވަރަކު 163 އިނާމް ވަނީ ހާސިލް ކޮށްފައެވެ. 2012 ވަނަ އަހަރު ޖަލާލުއްދީން ސްކޫލުގައި 547 ކުދިން ވަނީ ތައުލީމް ހާސިލްކޮށްފައެވެ.