ފުލުހުންގެ ސައިކަލަކާ އެކްސިޑެންޓުވި ސައިކަލް ދުއްވަން އިން މީހާ އިނީ މަސްތުގެ ހާލުގައި: ޕޮލިސް

ކުޅުދުއްފުށީގައި ފުލުހުން ޕެޓްރޯލް ކުރަމުންދިޔަ ސައިކަލަކާއި އިތުރު ސައިކަލެއް ޖެހި ހިނގި އެކްސިޑެންޓުގައި ފުލުހުންގެ ސައިކަލާ އެކްސިޑެންޓްވި އަނެއް ސައިކަލް ދުއްވަން އިން މީހާ އިނީ މަސްތުގެ ހާލުގައި ކަމަށް ފުލުހުން ބުނެފި އެވެ.

ފުލުހުން ބުނީ ފުލުހުންގެ ސައިކަލާ އެކްސިޑެންޓި އަނެއް ސައިކަލް ދުއްވަން އިނީ އުމުރުން 21 އަހަރުގެ މީހެއް ކަމަށާއި އޭނާ މަސްތުވާތަކެތި ބޭނުން ކޮށްގެން ހުރި ކަމަށް ތުހުމަތު ކުރެވިގެން ކުޑަކަމުދާތަކެތި ޓެސްޓްކުރިއިރު މަސްތުވާތަކެތީގެ 3 ބާވަތަކަށް ޕޮޒިޓިވް ވެފައިވާ ކަމަށެވެ. އަދި އޭނާގެ އަތުގައި އެވަގުތު ލައިސަންސް ނެތް ކަމަށް ފުލުހުން ބުނެއެވެ.

ކުޅުދުއްފުށީ ބަންޑާރަމަގުގައި ހިނގި މި އެކްސިޑެންޓުގައި ފުލުހުންގެ ސައިކަލް ދުއްވަން އިން ލާންސް ކޯޕްރަލް ޙައިދަރު މުހައްމަދު އަދި އެކްސިޑެންޓްވި އަނެއް ސައިކަލުގެ ފަހަތުގައި އިން އުމުރުން 19 އަހަރުގެ ފިރިހެން މީހާ އަށް ވަނީ އެކިވަރުގެ ގެއްލުންތައް ލިބިފައެވެ.

“މި  އެކްސިޑެންޓުގެ ސަބަބުން ފުލުސް މީހާގެ ބޮލަށާއި ކަނާއަތުގެ އުޅަބޮށި ކައިރީން ތަންގަނޑެއް ދުޅަވެ އަދި ވައަތުގެ ފައިގެ ކަށިމަތި ހަލާކުވެ ދުޅަވެފައިވާކަމަށާއި އަނިޔާވި ޢުމުރުން 19 އަހަރުގެ މީހާގެ ދެފައި އެކިތަންތަނުން ހަލާކުވެ، ނޭފަތް ފަޅައިގެންގޮސްފައިވާކަމަށް ހދ.ކުޅުދުއްފުށީ ރީޖަނަލް ހޮސްޕިޓަލުން އެމީހުން ބެއްލެވި ޑޮކްޓަރު ފުލުހުންނަށް ވަނީ މަޢުލޫމާތުދީފަ” ފުލުހުންގެ މީޑިޔާ ބަޔާނުގައި ވެއެވެ.

މި އެކްސިޑެންޓް ހިނގަން މެދުވެރިވި ސަބަބު ފުލުހުން ތަހުގީގު ކުރަމުންނެވެ.