ބަނޑުގެ އޮޕަރޭޝަނެއް ކުރުމަށް ވަޑި ހަސަންބެ އެހީތެރިކަމަށް ބޭނުންވެފައި

ހދ ކުޅުދުއްފުށީ އަލިހާ ހަސަން މޫސާ، ވަޑި ހަސަންބެ (50އ) އަކީ ބަނޑުގައި ހިލައުފެދުމުގެ ސަބަބުން ހުސްވި ސެޕްޓެމްބަރުމަހުގެ 25 ވަނަ ދުވަހު އޮޕަރޭޝަނެއް ކުރިވެފައިވާ މީހެކެވެ. އިންޑިޔާގެ ކޮސްމޯ ހޮސްޕިޓަލުގައި ކުރެވުނު މި އޮޕަރޭޝަނަށްފަހު ހަސަންބެގެ ހާލު ދެތިން ދުވަހަކު ރަނގަޅުކަމުގައި އާއިލާއަށް ފެނުނެވެ. ނަމަވެސް އަނެއްކާވެސް މިދިޔަ ހަފްތާގެ ތެރޭގައި ހަސަންބެގެ ބަނޑުގައި ރިއްސުން ގަދަވެ ޑޮކްޓަރަށް ދެއްކުމުން ބަނޑުގައި ފެންހެދިފައިވާކަން ވަނީ އެނގިފައެވެ. އަދި ކިމްސް ހޮސްޕިޓަލުގައި ހެދުނު ސްކޭން ތަކަކަށްފަހު ހޮޅިއެއް ބަނޑަށް ލައްވައިގެން ފެންތައް ނެރުމަށް ޑޮކްޓަރުން ވަނީ ލަފާދެއްވާފައެވެ. މިކަން ކުރެވޭނީ އިތުރު އޮޕަރޭޝަނެއްގެ ޒަރިއްޔާއިން ކަމަށާއި މިކަމަށް އިންޑިޔާ ފައިސާގެ ދެލައްކަ ރުޕީސް އަދި ދިވެހި ފައިސާއިންނަމަ ފަންސާސްދެހާސް ރުފިޔާ ހަރަދުވާނެ ކަމަށް އެހޮސްޕިޓަލުން ލަފާކުރެއެވެ.

އެހެން  ނަމަވެސް ހަސަންބެގެ ބަނޑުގެ މި އޮޕަރޭޝަން ކުރުމަށް އާއިލާގެ މާލީ ހާލަތު ތަނެއް ނުދެއެވެ. އެހެން ކަމުން ހަސަންބެގެ މި އޮޕަރޭޝަނަށް ހޭދަވާނެ ކަމަށް ލަފާކުރެވޭ ފައިސާގެ އަދަދު ހޯދުމަށް އާއްމު ރައްޔިތުންގެ ދީލަތި އެހީތެރިކަން ބޭނުންވާ ކަމަށް ހަސަންބެގެ އާއިލާއިން ހާމަކުރެއެވެ.

ހަސަންބެގެ އާއިލާގެ ފަރާތުން ކުޅުދުއްފުށީ އޮންލައިނާ ވާހަކަދެއްކި ހަސަންބެގެ ދަރިއެއް ކަމަށްވާ މަރިއަމް ހަސަން ބުނީ ބައްޕަގެ ބަނޑުގައި ހިލައުފެދިފައިވާކަން އެނގުނީ މިއަހަރުގެ މެއި މަހުގެ ތެރޭގައި ކަމަށާއި ހިލަ ނެގުމަށް ކުރި އޮޕަރޭޝަނުގައި ކަންތައްވީގޮތް އެނގުނީ މިދިޔަ ހަފްތާގެ ތެރޭގައި ކަމަށެވެ.

“ބައްޕަގެ ބަނޑުގަ ހިލަ އުފެދިފަ ހުރިކަން އެނގުނީ މިއަހަރު މެއިގަ. ދެން އިންޑިޔާއަށް ގޮސް މި އޮޕަރޭޝަން ކުރީ. އޮޕަރޭޝަނަށްފަހު ހާލު ހަމަ ރަނގަޅުވި. އެކަމަކު އަނެއްކަވެސް ފަހުން ބަނޑުގަ ވަރަށް ބޮޑަށް ރިއްސަންފެށީ. ދެން އިހައްދުވަހު އަސްލު އެނގުނީ އޮޕަރޭޝަނުގަ ބަނޑުގެ ލޭ ހޮޅިއެއް ބުރިކޮށްލިކަން. ދެން ޑޮކްޓަރުން ބުނަނީ ބަނޑުން ފެން ދަމަން ޖެހޭނީ އިތުރު އޮޕަރޭޝަނެއް ކުރާށޭ.” މަރީ ކިޔައިދިނެވެ.

އާމްދަނީ ހޯދުމުގެ ގޮތުން މަސްވެރިކަން ކުރަމުންއައި ހަސަންބެއަށް އެއްވެސް މަސައްކަތެއް ނުކުރެވޭތާ ދެއަހަރު ވެފައިވާ ކަމަށާއި ހަސަންބެގެ ތިބެނީ 4 ދަރިން ކަމަށް އާއިލާއިން މައުލޫމާތުދެއެވެ. އަދި ކިމްސް ހޮސްޕިޓަލުން ކޯޗީއަށް ހަސަންބެ ބަދަލުކުރެވިފައިވާ ކަމަށްވެސް އާއިލާއިން ހާމަކުރެއެވެ.

ހަސަންބެގެ ފަރުވާއަށް އެހީތެރިވާން ބޭނުންވާ ފަރާތްތަކުން އިތުރު މައުލޫމާތު ސާފުކުރެއް ވުމަށް (7830713/9714686) އަށް ގުޅުއްވުމަށް އާއިލާއިން އެދެއެވެ. އަދި ފައިސާގެ ދީލަތި އެހީ ދެއްވަން ބޭނުންވާ ފަރާތަކުން މަރިޔަމް ހަސަންގެ ބޭންކް އޮފް މޯލްޑިވްސްގެ 7706345974001 ނަމްބަރު އެކައުންޓަށް ނުވަތަ 7706345974002 ގެ ނަމްބަރު އެކައުންޓަށް ފައިސާ ޖަމާކުރުމަށް އާއިލާއިން އެދެއެވެ.

“ތިމާ އެހެންމީހެއްގެ އެހީތެރިކަމަށް ބޭނުންވާނީ ކޮން އިރަކުކަމެއް ނޭނގޭނެ. އެހެންވީމަ އަޅުގަނޑު ބުނާނީ ވީވަރަކުން ބައްޕައަށް އެހީތެރިވެދެއްވާށޭ. މިގޮތަށް ހޭދަކުރެވޭ އެއްމެ ރުފިޔާ އަކީވެސް ގެއްލިގެންދާނެ ރުފިޔާއެއް ނޫނޭ.” މަރީ ފާހަގަ ކުރިއެވެ.

އަމީރު އަމީން ސްކޫލުގައި މަސައްކަތް ކުރަމުން އަންނަ މަރީ ބުނީ އާއިލާއާއި ރަހްމަތްތެރިންގެ އެހީތެރިކަން ވަރަށްބޮޑަށް ލިބޭ ކަމަށާއި އަދި އަމީރު އަމީން ސްކޫލުގެ މުވައްޒަފުންގެ ފަރާތުން ލިބޭ އެހީތެރިކަން ޝުކުރުވެރި ކަމާއެކު ބަލައިގަންނަ ކަމަށެވެ.